گەرمانيا استاناسىندا دينا نۇرپەيىسوۆا اتىنداعى اتىراۋ اكادەميالىق حالىق اسپاپتارى وركەسترىنىڭ كونسەرتى ءوتتى.
مادەني شارا قازاقستان مەن گەرمانيا اراسىندا ديپلوماتيالىق قاتىناستار ورناۋىنىڭ 30 جىلدىعىنا ارنالدى. دينا نۇرپەيىسوۆا اتىنداعى اتىراۋ اكادەميالىق حالىق اسپاپتار وركەسترى وسىعان دەيىن فرانسيا، اۆستريا جانە سەربيادا ونەر كورسەتتى، دەپ حابارلايدى Almaty-akshamy.kz 24.kz-كە سىلتەمە جاساپ.
وركەستر كونسەرتحاۋس ساحناسىندا ونەر كورسەتتى. قازاق وركەسترىن تىڭداۋ ءۇشىن ساياساتكەرلەر، ديپلوماتتار، كاسىپكەرلەر مەن ونەرسۇيەر قاۋىم كەلدى. قازاقستان مەن گەرمانيا اراسىنداعى دوستىقتىڭ 30 جىلدىعىنا ارنالعان كونسەرتتى بەرليندەگى ەلشىمىز نۇرلان وڭجانوۆ پەن گەرمانيا سىرتقى ىستەر مينيسترلىگىنىڭ ۋاكىلى ماتتياس ليۋتتەنبەرگ اشتى. ونەرپازدار بەرلينگە «ەۋروپاداعى ۇلى دالا اۋەندەرى» دەپ اتالاتىن ەرەكشە باعدارلاما اكەلدى. ۇجىم كورەرمەننىڭ نازارىنا قازاق حالىق مۋزىكاسىنىڭ تۋىندىلارىن ۇسىندى.
مەرەكەلىك كەشتى تۇركەشتىڭ «كوڭىلاشار» كۇيى اشتى. وسىدان كەيىن باس ديريجەر بولات دولداشيەۆ باسقارعان وركەستر قۇرمانعازى مەن دينا نۇرپەيىسوۆانىڭ ايگىلى كۇيلەرىن ورىنداپ بەردى.
«كونسەرت ماعان وتە ۇنادى. قازاق ۇلتتىق اسپاپتارىنىڭ مۋزىكالىق پاليتراسىنا ءتانتى بولىپ، حالىق مۋزىكالارىڭىزبەن تانىستىم. وركەستر وتە جوعارى دەڭگەيدە ورىندادى. ايتا كەتۋ كەرەك، رادەسكيي مارشىن ەستىپ، تاڭ قالدىم. بەيىمدەۋى وتە قىزىق بولدى»، - دەيدى گفر ءسىم شىعىس ەۋروپا، وڭتۇستىك كاۆكاز جانە ورتالىق ازيا ەلدەرىمەن ىنتىماقتاستىق جونىندە ۋاكىلى ماتتياس ليۋتتەنبەرگ.
دومبىرا، قىلقوبىز بەن شەرتەردىڭ بىرەگەي اۋەنى كورەرمەندى باۋراپ الدى. سونداي-اق ولار سوليستەردىڭ انشىلىك شەبەرلىگىن جوعارى باعالادى. ال نەمىس كلاسسيگى گەتەمەن بايلانىستى ۇلى ابايدىڭ مۋزىكاسى توسىن سىي بولدى.
«شەتەلدىك كومپوزيتورلاردان شتراۋستىڭ شىعارماسىن وينادىق. سوسىن «قاراڭعى تۇندە تاۋ قالعىپ» - گەتەنىڭ «پەسنيا نوچنوگو ستراننيكا» دەپ اتالاتىن ولەڭىن اۋەلى لەرمونتوۆ ورىس تىلىنە، ودان ارى قاراي اباي قۇنانبايەۆ قازاق تىلىنە اۋدارعان بولاتىن. مىنە، وسى ءاندى بۇگىن تارتۋ رەتىندە الا كەلدىك»، - دەيدى دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترىنىڭ باسشىسى ساعىنتاي كوپجاساروۆ.
كورەرمەنگە جيىرمادان اسا تۋىندى ۇسىنىلدى. كونسەرتتى كۇي تارتىسىن شەبەر ورىنداعان دومبىراشىلار اياقتادى. كورەمەندەر كوشەمەت كورسەتىپ، ارىتستەرىمىزدى جىبەرگىسى كەلگەن جوق. سوندىقتان ولار ساحنادا قالىپ، تاعى ءۇش شىعارمانى ورىنداپ بەردى.
ەدۋارد كينسبرۋنەر، گەرمانيا ەكونوميكاسى شىعىس كوميتەتىنىڭ وڭىرلىك ديرەكتورى: - بەرليندە قازاقتىڭ ءداستۇرلى مۋزىكاسىن تىڭداۋعا مۇمكىندىك تۋىنداعاندا، مەن ۇنەمى قۋانا بارامىن. اسىرەسە، ول وسىنداي كەرەمەت زالدا ورىندالسا. كونسەرتكە ءتانتى بولدىم. اسىرەسە، دومبىراشىلار تريوسى ۇنادى.
اتىراۋلىق ارتىستەر بەرلين تۇرعىندارىنا ۇمىتىلماس كەش سىيلادى. ەندى ونەرپازدارىمىزدى تومەنگى ساكسونيانىڭ ورتالىعى - گاننوۆەر قالاسىندا كۇتىپ وتىر.