بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى.
مەرزىمى وتكەن بەرەشەگى بار ازاماتتارعا كەپىلسىز تۇتىنۋشىلىق قارىز بەن ميكروكرەديتتەر بەرۋگە شەكتەۋ ەنگىزىلەدى، دەپ حابارلايدى Almaty-akshamy.kz
اگەنتتىك پرەزيدەنت تاپسىرماسىن ورىنداۋ ءۇشىن كەپىلسىز تۇتىنۋشىلىق كرەديت بەرۋدى رەتتەۋ بويىنشا قوسىمشا جۇيەلى شارالار ازىرلەگەن.
«كۇنتىزبەلىك 90 كۇننەن استام مەرزىمى وتكەن بەرەشەگى بار ازاماتتارعا كەپىلسىز تۇتىنۋشىلىق قارىزدار مەن ميكروكرەديتتەر بەرۋگە شەكتەۋلەر ەنگىزىلەدى. بۇل شارا تولەم جاساۋعا قابىلەتسىز قارىز الۋشىلارعا جاڭا كرەديت بەرۋدى جانە بورىش جۇكتەمەسىنىڭ ءوسۋىن شەكتەيدى»، - دەدى ءابىلقاسىموۆا ۇكىمەت وتىرىسىندا.
سونداي-اق بورىش جۇكتەمەسىن شەكتەۋ ءۇشىن بانكتەردىڭ جىلدىق ءتيىمدى مولشەرلەمەسىنىڭ شەكتى ءمانىن قايتا قاراۋ بويىنشا جۇمىس جۇرگىزىلەدى.
«حالىقارالىق تاجىريبەگە سايكەس، جىلدىق ءتيىمدى مولشەرلەمە پايىزدىق مارجا، تاۋەكەل ءۇشىن سىياقى، وپەراسيالىق شىعىستار جانە قورلاندىرۋ قۇنى سياقتى نارىقتىق فاكتورلارعا بايلانىستى بەلگىلەنەدى. تۇتىنۋشىلىق كرەديتتەر بويىنشا سىياقى مولشەرلەمەسىنىڭ تورەلىگىن جويۋ ءۇشىن ميكروقارجى ۇيىمدارىنىڭ تۇتىنۋشىلىق ميكروكرەديتتەرى بويىنشا سىياقىنىڭ شەكتى مولشەرلەمەلەرىن رەتتەۋ قوسىمشا قاتاڭداتىلادى»، - دەدى اگەنتتىك ءتوراعاسى.
كوللەكتورلار قىلمىستىق جاۋاپقا تارتىلۋى مۇمكىن
ءابىلقاسىموۆانىڭ ايتۋىنشا، كوللەكتورلىق قىزمەتتى رەتتەۋدى قاتاڭداتۋ ءۇشىن نارىق سۋبەكتىلەرىنە اكىمشىلىك ايىپپۇل مولشەرىن 2 ەسە (300 اەك-تان 600 اەك-كە دەيىن) ارتتىرۋدى، سونداي-اق كوللەكتورلىق اگەنتتىكتەر قىزمەتكەرلەرىنىڭ دەربەس اكىمشىلىك جانە قىلمىستىق جاۋاپكەرشىلىگىن ەنگىزۋدى كوزدەيتىن زاڭنامالىق تۇزەتۋلەر ازىرلەندى.
«2022 جىلعى قاراشادا ۇكىمەتكە ءتيىستى تۇزەتۋلەر ەنگىزىلدى جانە ولار بويىنشا بەلگىلەنگەن تارتىپپەن كەلىسۋ راسىمدەرى جۇرگىزىلىپ جاتىر»، - دەدى ول.
بۇعان قوسا، بورىشكەرلەردى كوللەكتورلاردىڭ زاڭسىز ىس-ارەكەتىنەن قورعاۋ ءۇشىن بيىل بانكتەر مەن ميكروقارجى ۇيىمدارىنىڭ جەكە تۇلعالاردىڭ مەرزىمى وتكەن بەرەشەكتى رەتتەۋ راسىمدەرى جۇرگىزىلمەگەن كرەديتتەرىن ساتۋىنا قاتىستى زاڭنامالىق شەكتەۋلەردى ەنگىزۋ ماسەلەسى پىسىقتالادى.
سونداي-اق، كوللەكتورلار ساتىپ العان كرەديتتەر بويىنشا بەرەشەكتى رەتتەۋ راسىمدەرىن جۇرگىزۋگە مىندەتتەلۋى مۇمكىن. اگەنتتىك وسىنداي زاڭنامالىق تالاپ ەنگىزۋدى جوسپارلاپ وتىر.