ق ر ەڭبەك جانە حالىقتى الەۋمەتتىك قورعاۋ مينيسترلىگىندە مەملەكەت قايراتكەرى بەردىبەك ساپاربايەۆتى ەسكە الۋعا ارنالعان جيىن ءوتتى. ءىس-شاراعا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، ۆيسە-مينيسترلەر، كوميتەت ءتوراعالارى، سالا ارداگەرلەرى جانە ۆەدومستۆونىڭ قىزمەتكەرلەرى قاتىستى.
جيىنعا قاتىسۋشىلار كورنەكتى ساياساتكەردى ەسكە الا وتىرىپ، ب.ساپاربايەۆپەن بىرلەسە جۇمىس جاساعان كەزدەگى جەتىستىكتەرى، ونىڭ ادامي جەكە قاسيەتتەرى مەن جالپى ەلىمىزدىڭ جانە وڭىرلەردىڭ ەكونوميكالىق، الەۋمەتتىك-مادەني دامۋىنا قوسقان ولشەۋسىز ۇلەسى تۋرالى ەستەلىكتەرىمەن ءبولىستى.
«بەردىبەك ماشبەك ۇلى تاۋەلسىز ەلىمىزدىڭ قالىپتاسۋى مەن دامۋى جولىندا ولشەۋسىز جانە سۇبەلى ۇلەس قوسقان قايراتكەر تۇلعا ەدى. ول ءوزىنىڭ ادامي قاراپايىمدىلىعى مەن ەمەن-جارقىن اشىقتىعى ارقاسىندا ەل ىشىندەگى بەدەلدى اقساقالدار الدىندا دا، قاراماعىنداعى ماماندار اراسىندا دا زور قۇرمەتكە يە بولدى. كۇن تارتىبىندەگى كەز كەلگەن ماسەلەنىڭ ۇتىمدى شەشىمدەرىن ويلاستىرا وتىرىپ، قوعامداعى ءتۇرلى ساناتتاعى وكىلدەرمەن ورتاق ءتىل تابىسا الاتىن. سول ارقىلى ەلىمىزدەگى الەۋمەتتىك-ەڭبەك سالاسىنداعى جوسپارلاردى حالىققا ءتيىمدى ەتىپ قۇرىپ، كوپتەگەن قىزمەتپەن مەملەكەتتىك كومەكتىڭ شىن مۇقتاج ادامدار ءۇشىن قولجەتىمدى بولۋىن قاتاڭ قاداعالادى. شىن مانىسىندە، ءاربىر ماسەلەنىڭ جاي-جاپسارىن تەرەڭ ۇعىنىپ، تولىققاندى تۇسىنە الۋ جانە تىڭعىلىقتى ءبىلۋ قابىلەتى، تىڭ جانە ايرىقشا ويلاۋ دارەجەسى، سونداي-اق اينالاسىنداعى ادامدارعا قۇرمەتپەن قارايتىن كوزقاراسى ونىڭ كوشباسشىلىق قاسيەتىن انىقتادى»، – دەپ اتاپ ءوتتى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا.
ءار جىلدارى بەردىبەك ساپاربايەۆ ءتۇرلى مەملەكەتتىك جانە ساياسي لاۋازىمداردى اتقاردى، ونىڭ ىشىندە ەگەمەندى ەل تاريحىنداعى رەسپۋبليكانىڭ 5 ءوڭىرىن باسقارعان بىردەن ءبىر اكىم. بۇدان باسقا ەكى رەت ق ر ەڭبەك جانە حالىقتى الەۋمەتتىك قورعاۋ ءمينيسترى جانە ق ر پرەمەر-مينيسترىنىڭ ورىنباسارى بولۋى ب.ساپاربايەۆتىڭ ناعىز ەلجاندى قايراتكەر ەكەنىن تانىتادى.