ول 1974 جىلى ورال قالاسىندا دۇنيەگە كەلگەن.
ارىپتەستەرىنىڭ جازۋىنشا، مۋزىكانتتىڭ جۇرەگى توقتاپ قالعان، دەپ حابارلايدى Almaty-akshamy.kz
ارمان دۇيسەنوۆ - بەلگىلى كومپوزيتور، مۋزىكانت، ءانشى، پروديۋسەر، تەلەجۇرگىزۋشى، تالاي قازاقشا حيتتەردىڭ اۆتورى. ونى ارىپتەستەرى الەمدىك كلاسسيكالىق مۋزىكا، فولكلورلىق ەتنوگرافيا، ەسترادالىق مۋزىكا سياقتى بىرنەشە باعىتتا كاسىبي مۋزىكالىق ءبىلىم العان قازاقستاننىڭ زاماناۋي كومپوزيتورلارىنىڭ ءبىرى دەپ، جوعارى باعالايدى.
ارمان دۇيسەنوۆتىڭ، اسىرەسە، التىناي جورابايەۆا ورىندايتىن «اعاجان» ءانى مەن دينارا قىرىقبايەۆا شىرقايتىن «ۇستازىم» ءانى كوپكە تانىمال. مەكتەپ وقۋشىلارى «ۇستازىم» ءانىن ءالى دە ورىنداپ ءجۇر. سونىمەن قاتار كومپوزيتوردىڭ «فوتوگراف»، «سەن»، «ماڭگىلىككە»، «باقىت تاڭى»، «ءۇمىت ارمان»، «سەن عانا» اندەرى دە بەلگىلى.
مۋزىكانتتىڭ شىعارماشىلىق جولى 1990 جىلى پاۆلودار قالاسىندا وتكەن XXII رەسپۋبليكالىق جاس ورىنداۋشىلار بايقاۋىندا جەڭىمپاز اتانعاننان كەيىن باستالدى. سول جىلى ديريجەرلەر ت.ابدىراشيەۆ پەن يۋ.دوروحوۆسكييدىڭ جەتەكشىلىگىمەن سيمفونيالىق وركەستر قۇرامىندا شۆەيساريا قالالارى مەن ليحتەنشتەين كنيازدىگىنە حالىقارالىق گاسترولدىك ساپارعا قاتىستى. 1995 جىلى «دوستار» پوپ-دجاز-روك توبىنىڭ جەتەكشىسى بولا ءجۇرىپ، رەسپۋبليكالىق «جاس-قانات» بايقاۋىندا «حالىق تاڭداۋى» سىيلىعىنىڭ يەگەرى اتاندى. 1992-1996 جىلدار ارالىعىندا ول جىل سايىن بايرويتتەگى (گەرمانيا) حالىقارالىق Das Treffen فەستيۆالىنە قاتىسادى. وندا الەمنىڭ 42 ەلىنىڭ وكىلدەرى قاتىساتىن سيمفونيالىق وركەستردە ءۇش رەت گران-پري لاۋرەاتى جانە توپتىڭ سۇيەمەلدەۋشىسى بولدى.
1997 جىلدان بەرى قۇرمانعازى اتىنداعى قازاق ۇلتتىق كونسەرۆاتورياسىن بىتىرگەننەن كەيىن قازاقستان رەسپۋبليكاسىنىڭ حالىق ءارتيسى رايىمبەك سەيتمەتوۆ نەگىزىن قالاعان «ونەر» فاكۋلتەتىنىڭ «مۋزىكا جانە ورىنداۋشىلىق ونەر» كافەدراسىندا ساباق بەرگەن. سودان كەيىن تۇركىستانداعى حالىقارالىق قازاق-تۇرىك ح.ا.ۋنيۆەرسيتەتىندە ءاسانالى ءاشىموۆ، راحمانقۇل بەردىبايەۆ، باعىبەك قۇنداقبايەۆ، اشىربەك سىعايەۆتارمەن بىرگە رەسپۋبليكالىق جانە حالىقارالىق بايقاۋلاردىڭ لاۋرەاتتارى اتانعان جاس تالانتتى انشىلەر مەن اكتەرلاردى تاربيەلەۋگە اتسالىستى.