ماقساتىم ءتىل ۇيرەنىپ، قازاقستانعا تاعى ءبىر ساپارلاۋ.
بۇل بەلگيا ازاماتى ستەين رومبوۋتتىڭ ارمانى. ول وسىدان التى جىل بۇرىن ءبىزدىڭ ەلگە كەلىپ، سايىن دالا مەن تۇمسا تابيعاتقا عاشىق بولعان. ءقازىر ول ينتەرنەت ارقىلى قازاق ءتىلىن ۇيرەنىپ ءجۇر. ءتىپتى ەسىمىن دە قازاقشالاپ الىپتى، دەپ حابارلايدى Almaty-akshamy.kz 24.kz-كە سىلتەمە جاساپ.
بىرنەشە جىل بۇرىن ورتا مەكتەپ وقۋشى بولىپ جۇرگەن بەلگيالىق ستەين رومبوۋت قازاقستاننىڭ وڭتۇستىگىنە تۋريست رەتىندە ساپارعا بارادى. جەرىمىزگە، ەلىمىزگە عاشىق بولعان ول، بەلگياعا قايتقان سون قازاق ءتىلىڭ ينتەرنەت ارقىلى، ءوز بەتىمەن وقي باستايدى. بۇگىن ستەين سول ەلدىڭ كونە ۋنيۆەرسيتەتتەرىنىڭ ءبىرىنىڭ ماگيسترانتى جانە بىرنەشە ءتىلدى بىلەتىن پوليگلوت. ونىڭ ىشىندە قازاق ءتىلى دە بار.
ستەين رومبوۋت، Ku Leuven ۋنيۆەرسيتەتىنىڭ ماگيسترانتى: - مەن التى جىل بۇرىن قازاقستانعا تۋريست رەتىندە باردىم. الماتىدا بولدىم، شىمكەنت، تۇركىستان، تاراز، جالپى قازاقستاننىڭ وڭتۇستىگىن تۇگەل ارالادىم. ماعان الماتى كوبىرەك ۇنادى. مەن ءۇشىن قازاق ءتىلى وتە ادەمى ءتىل. ماعان ورتالىق ازيانىڭ ىشىندە قازاقستان جانىما جاقىن بولدى. سوندىقتان قازاق ءتىلىن ۇيرەنەمىن دەپ شەشتىم.
ستەيننىڭ قازاقشا دە ەسىمى بار – بىزشە سىرىم. اتىن بەلگىلى قازاق باتىرى سىرىم دات ۇلىنىڭ قۇرمەتىنە تاڭداعان. ءقازىر ول قازاقستاننىڭ تاريحى مەن مادەنيەتىن تەرەن زەرتتەۋدە.
ستەين رومبوۋت، Ku Leuven ۋنيۆەرسيتەتىنىڭ ماگيسترانتى: - ماعان قازاق حالقى وتە ۇنايدى. باسقا ەلدەرمەن سالىستارعاندا، قازاقتار قوناقجاي كەلەدى. مۇنداعى ادامدار ولارداي قوناقجاي ەمەس. سونداي-اق قازاقتىڭ تاماعى وتە ءدامدى. مەن بەشپارماق جەدىم، قۇىرداق، باۋىرساق.
ستەين، ياعني سىرىمنىڭ قازاقتارعا ايتار العىسى زور. ول ءبىزدىڭ ەلگە تاعى كەلىپ، قازاق ءتىلىن تەرەڭدەتىپ وقۋدى جوسپارلاپ ءجۇر.
ستەين رومبوۋت، Ku Leuven ۋنيۆەرسيتەتىنىڭ ماگيسترانتى: - مەن قازاقتارعا كوپ راقمەت ايتقىم كەلەدى. ويتكەنى مەن قازاقستاندا بولدىم، جاقسىلىق كوردىم. قازاقستاننىڭ بولاشاعى زور بولادى دەپ ۇمىتتەنەمىن.
جانات ەرنست، ءتىلشى: - الداعى كۇندەرى ستەين رومبوۋت قىتايعا جول جۇرەدى. ماقساتى ءبىلىم الۋ، ەلىنە پايدا اكەلۋ. وقىپ ءجۇرىپ شەتەل ارالاسام دەگەن دە ارمانى بار. ونىڭ ىشىندە قازاقستاندى كورۋ الدىڭعى ورىندا تۇر.