ق ر عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن الماتىدا «جاستار Apartments» جاڭا زاماناۋي جاتاقحانا اشىلدى، دەپ حابارلايدى Almaty-akshamy.kz
بۇل جاڭا جاتاقحاناعا الماتى قالاسىنداعى جوعارى وقۋ ورىندارىنىڭ جاتاقحاناعا مۇقتاج ءبىلىم الۋشى جاستارى ورنالاستىرىلادى.
بۇگىن مەملەكەت باسشىسى قاسىم-جومارت توقايەۆتىڭ جاتاقحانا تاپشىلىعىن جويۋ بويىنشا بەرىلگەن تاپسىرماسىن جۇزەگە اسىرۋ ماقساتىندا 300 ورىندىق جاڭا جاتاقحانا ستۋدەنتتەر ءۇشىن پايدالانۋعا بەرىلىپ وتىر.
جاتاقحانانىڭ اشىلۋ سالتاناتىنا پارلامەنت ءماجىلىسىنىڭ دەپۋتاتى ەلنۇر بەيسەنبايەۆ، قالا اكىمدىگىنىڭ وكىلدەرى، جوعارى وقۋ ورىندارىنىڭ باسشىلارى، عالىمدارى مەن پروفەسسور-وقىتۋشىلار قۇرامى قاتىستى.
“ەلىمىزدە جاتاقحانا ماسەلەسى وتە وزەكتى. الماتى قالاسىندا جاتاقحانا تاپشىلىعى جوعارى. وسى ماسەلە بويىنشا ءبىز ەكى باعىت بويىنشا جۇمىس ىستەپ جاتىرمىز. ءبىرىنشىسى جەكە مەنشىك حوستەلدەرمەن جانە قوناق ۇيلەرمەن كەلىسىمشارتقا قول قويىلدى. وسى كەلىسىم ارقىلى قوسىمشا 10 000-نان استام توسەك-ورىن تابىلىپ وتىر. بۇگىندە قالادا جەر تاپشىلىعى بار. سوندىقتان ەكىنشى باعىت ول قايتا جوندەۋ جۇمىسى. ياعني بيزنەسى قۇلدىراپ كەتكەن اكادەميالىق نەمەسە جەكە مەنشىك عيماراتتارىندا ءبىز قايتا جوندەۋ جۇمىستارىن جۇرگىزىپ، جاتاقحانا رەتىندە قايتا جاساقتاپ جاتىرمىز. بۇگىنگى جاتاقحانا وسى ەكىنشى باعىت بويىنشا اشىلىپ وتىر”، - دەدى ساياسات نۇربەك.
عيماراتتا قايتا جوندەۋ جۇمىستارى 2023 جىلدىڭ ءبىرىنشى جارتىسىندا باستالعان بولاتىن. جاتاقحانانىڭ ىشكى ساۋلەتى شەتەلدىك كوشباسشى ۋنيۆەرسيتەتتەردىڭ ديزاينى نەگىزىندە جاسالدى. نىسان ءتيىستى تالاپتارعا تولىق سايكەس كەلەدى. ءتورت قاباتتان تۇراتىن جاتاقحانادا اسحانا، دەمالىس بولمەلەرى، كىر جۋۋعا جانە كەپتىرۋگە ارنالعان تۇرمىستىق بولمە، ءار قاباتتا ءوز اس ءۇيى مەن وقۋ زالدارى قاراستىرىلعان. سونداي-اق ءار سەكسياعا توڭازتقىش، زاماناۋي دۋش كابينالارى مەن جاڭادان جيھازدار قويىلعان. قاۋىپسىزدىكتى قامتاماسىز ەتۋ ءۇشىن بەينەباقىلاۋ جۇيەسى ورناتىلعان.