ەلورداداعى تاۋەلسىزدىك سارايىندا ءوتىپ جاتقان شانحاي ىنتىماقتاستىق ۇيىمىنىڭ سامميتىندە مۇشە مەملەكەتتەردىڭ باسشىلارى بەلارۋس رەسپۋبليكاسىن ۇيىم مۇشەلەگىنە قابىلداۋعا قاتىستى ءبىرقاتار قۇجاتقا قول قويدى، دەپ حابارلايدى اlmaty-akshamy.kz.
«شانحاي رۋحىن نىعايتۋ جانە شانحاي پرينسيپتەرىن ىلگەرىلەتۋ ارقىلى ءبىز شىۇ-نى ەڭ بەدەلدى حالىقارالىق قۇرىلىمداردىڭ بىرىنە اينالدىردىق. ءبىزدىڭ بىرلەستىگىمىزدىڭ بىرەگەيلىگى مەن وراسان زور الەۋەتىنىڭ ارقاسىندا الەمدە وعان دەگەن قىزىعۋشىلىق تۇراقتى تۇردە ارتىپ كەلەدى. بۇگىن استاناداعى سامميتتە ۇيىمىمىزدى ودان ءارى كەڭەيتۋ تۋرالى ماڭىزدى شەشىم قابىلدانادى. وسىعان بايلانىستى بەلارۋس رەسپۋبليكاسىنىڭ پرەزيدەنتى قۇرمەتتى الەكساندر گريگوريەۆيچ لۋكاشەنكوعا قوش كەلدىڭىز دەمەكپىن»، - دەدى سامميت بارىسىندا قازاقستان پرەزيدەنتى.
مەملەكەت باسشىسىنىڭ اتاپ وتۋىنشە، بەلارۋس شىۇ-عا تولىققاندى مۇشە بولۋ جولىندا قاجەتتى راسىمدەردىڭ ءبارىن ورىنداعان.
«ەگەر قارسىلىق بولماسا وتىرىستى بەلارۋس رەسپۋبليكاسىن شىۇ-عا مۇشە مەملەكەتتەردىڭ قۇرامىنا قابىلداۋ تۋرالى قۇجاتتارعا قول قويۋ راسىمىنەن باستاساق»، - دەپ ۇسىنىس جاسادى قاسىم-جومارت توقايەۆ.
وسىدان كەيىن شىۇ-عا مۇشە مەملەكەتتەردىڭ باسشىلارى بەلارۋس رەسپۋبليكاسىن ۇيىم قۇرامىنا قابىلداۋعا بايلانىستى ءبىرقاتار قۇجاتقا قول قويدى.