البەتتە مەن اتاۋىنا قاتتى ماسەلە قويىپ تۇرعان جوقپىن. بۇرىن بىلەسىز، پارتيانىڭ «وتان» دەگەن جاقسى اتى بولاتىن. كەيىن ونى Nur Otan دەپ وزگەرتتى. ەندى Amanat اتالىپ جاتىر.
نەگىزى، "امانات" دەگەن قازاقتا وتە قاستەرلى ءسوز. بۇل پارتيا ەندى باستىقتاردىڭ پارتياسى ەمەس، قاراپايىم حالىقتىڭ پارتياسى بولسىن دەگەن تىلەك قويامىن. بىلاي قاراپ تۇرساڭىز، بۇرىن Nur Otan پارتياسىن حالىق تەك شەنەۋنىكتەر مەن اكىمدەردىڭ پارتياسى سياقتى قابىلدايتىن ەدى.
پارتيا دەگەنىمىز تەك ءبىر كاتەگوريانىڭ پارتياسى بولماۋى كەرەك. ول بۇكىل حالىقتىڭ پارتياسى بولۋى ءتيىس. سوندىقتان "امانات" پارتياسى قاراپايىم حالىقتىڭ اماناتى بولسىن ءارى بۇل پارتيا ءار اۋىلدا، ءار كىشكەنتاي قالادا بولۋى كەرەك. سونىمەن قاتار تەك قانا ەسەپ، ادەمى بەينە ءۇشىن عانا ەمەس، حالىق ءۇشىن كادىمگىدەي جۇمىس ىستەپ، حالىقپەن كەزدەسىپ، وزدەرىنىڭ جيىنىنا قاراپايىم حالىقتى دا كىرگىزۋى كەرەك.
بۇكىل ساياسي پارتيالار وسىنداي باعىتتا جۇمىس ىستەۋى قاجەت. پارتيانىڭ ءبىرىنشى ماقساتى – حالىقتىڭ يگىلىگى ءۇشىن ونىڭ قۇقىن قورعاپ، حالىقتىڭ ماسەلەسىن شەشەتىن پارتيا بولۋى ءتيىس. مەن تەك ءبىر پارتيانىڭ دومينانتتى بولعانىن قالامايمىن. بۇرىن Nur Otan پارتياسىنىڭ مۇشەلەرى پارلامەنتتىڭ جارتىسىنا جۋىعىن الاتىن دا، باسقا پارتيالار وتە از بولاتىن.
ءبىز ءقازىر ءبىر مانداتتىق سايلاۋدى قولداۋىمىز كەرەك جانە باسقا دا پارتيالارعا مۇمكىندىك بەرۋىمىز كەرەك. تىركەلمەگەن پارتيالار قانشاما، مىنە، سولارعا دا جول بەرىلگەنى جاقسى. سوندىقتان "اماناتتىڭ" تاعى دا ءبىر اماناتى – وسى تىركەلمەگەن پارتيا، ۇيىمدارمەن بىرگە جۇمىس ىستەپ، قازاقستاننىڭ دامۋىنا بىرگە ارەكەت جاساۋىن كۇتەمىن.
پارتيالاردى مەملەكەتتىڭ قارجىلاندىرۋىن مۇلدەم تۇسىنە المايمىن. دۇنيەجۇزىندە ول جوق نارسە. ءار پارتيا ءوزى قارجى كوزىن تابۋى كەرەك. پارتيالارعا بيۋدجەتتەن اقشا الۋدى دوعارعان ءجون.
جازىپ الىپ، دايىنداعان اسەل داعجان.