فەيسبۋك الەۋمەتتىك جەلىسىندە سەرىك حاسەنوۆ ەسىمدى وقىرمان بەكبولات تىلەۋحان ورىندايتىن "ەلىم مەنىڭ" ءانى تۋرالى كۇتپەگەن جازبا جاريالادى. حاسەنوۆتىڭ جازۋىنشا، بۇل ءاندى بەكبولات تىلەۋحان ءوزىنىڭ شىعارعانىن ايتقانىمەن، شىن مانىندە، ءاننىڭ اۆتورى – بەلگىلى ونەر يەسى عاريفوللا قۇرمانعالييەۆ كورىنەدى.
بۇل تۋرالى قۇرمانعالييەۆتىڭ نەمەرەسى، ونەرتانۋ عىلىمىنىڭ كانديداتى مەرۋەرت سانات قىزى مالىمدەمە جاسادى. ونىڭ ايتۋىنشا، بەكبولات تىلەۋحان كونسەرۆاتوريادا وقىپ جۇرگەندە عاريفوللا قۇرمانعالييەۆتىڭ ارحيۆىمەن تانىس بولعان.
"بەكبولات ءبىزدىڭ ۇيگە ءجيى كەلىپ، اتامنىڭ ارحيۆىمەن جۇمىس ىستەيتىن. ءبىراق ءبىز ونىڭ ءاندى ءوز اتىنان ايتپاق ويى بار ەكەنىن بىلمەدىك. كەيىن اتامنىڭ مەرەيتويىنا وراي ءارحيۆتى قاراپ وتىرعاندا، وسى ءاننىڭ نوتالارىن كەزدەستىردىك. جۇبايىم بۇل ءاندى بىردەن تانىدى – بۇگىندە بەكبولاتتىڭ ورىنداۋىنداعى "ەلىم مەنىڭ" ءانى ەكەنىن اڭعاردىق. بۇل ءاندى اتام ەرتەدە شىعارعانىمەن، حالىققا تاراتۋ مۇمكىندىگى بولماعان"، – دەدى مەرۋەرت سانات قىزى.
ونىڭ سوزىنشە، بۇل ماسەلەنى بەيبىت جولمەن شەشۋگە بىرنەشە مارتە تالپىنىس جاسالعان. الايدا بەكبولات تىلەۋحان ولاردىڭ تالاپتارىن ەلەمەي، جاعدايدى ۋشىقتىرعان.
"ءبىز ونىمەن سويلەسۋگە بارعاندا، ول: 'سەندەردىڭ قولدارىڭنان نە كەلەدى؟ اقشاڭ دا، بيلىگىڭ دە جوق' دەپ ءبىزدى كەرى قايتاردى"، – دەپ ەسكە الدى مەرۋەرت حانىم.
ماسەلەنى زاڭ جۇزىندە شەشۋ دە ناتيجە بەرمەگەن. ويتكەنى سول كەزدەگى سوتتار ءان اۆتورلىعىن تەكسەرۋدى قابىلداماي، ارىزدى كەرى قايتارعان. "سوتقا قايتا جۇگىنگەنىمىزدە، ول شەتەلدە ءجۇر ەكەن. ءقازىر بۇل ماسەلەنى قايتا كوتەرىپ، ادىلدىك ورناتۋعا تىرىسۋدامىز"، – دەپ اتاپ ءوتتى قۇرمانعالييەۆتىڭ نەمەرەسى.
بۇل جاعداي كوپشىلىك اراسىندا ۇلكەن رەزونانس تۋعىزىپ، اۆتورلىق قۇقىق تۋرالى ماسەلەگە قوعام نازارىن اۋدارتتى.