بەيجىڭگە قۇرامىندا ىندەت جۇقتىرعاندار بار كوماندا قاتىسا الا ما؟

كوماندادان ىندەت جۇقتىرعان سپورتشى شەتتەتىلمەيدى 

بەيجىڭ وليمپياداسىندا كوماندا مۇشەلەرى كوروناۆيرۋس جۇقتىرعان جاعدايدا، قۇرامالار وليمپيادادان الاستاتىلمايدى، دەپ حابارلايدى Almaty-akshamy.kz

بۇل تۋرالى حالىقارالىق وليمپيادالىق كوميتەت مالىمدەدى. 

ەگەر وليمپيادا كەزىندە سپورتشىدان كوروناۆيرۋس تابىلسا، ول اۋرۋحانادا نەمەسە يزولياتوردا وقشاۋلانادى. وليمپيادا كەزىندە وقشاۋلاعىشتان شىعۋ ءۇشىن 24 ساعات كولەمىندە كوروناۆيرۋسقا تاپسىرىلعان ەكى تەست تەرىس ناتيجە كورسەتۋى كەرەك. سونداي-اق، ءۇش كۇن قاتارىنان دەنە تەمپەراتۋراسى قالىپتى جاعدايدا بولىپ، كوروناۆيرۋس بەلگىلەرى بايقالماۋى ءتيىس.  

وسى ورايدا، كوروناۆيرۋس جۇقتىرعان اداممەن بايلانىستا بولعان كوماندانىڭ وزگە مۇشەلەرى كوۆيد حاتتامالارىن ساقتاۋ ارقىلى جارىستى جالعاستىرا بەرەدى. 

ناۋقاسپەن جاقىن بايلانىستا بولعاندار كوروناۆيرۋسقا تەست تاپسىرىپ، ناتيجەسى تەرىس شىققان جاعدايدا كارانتين شارالارىن ساقتاپ، ۇنەمى بەتپەردە تاعىپ، تاماقتى جالعىز ءوزى ءىشىپ، وزگەلەردەن 2 مەتر الشاق جۇرەدى. سونىمەن قاتار، كۇنىنە ءۇش رەت دەنە قىزۋىن ولشەپ، جارىس باستالۋىنا 12 جانە 6 ساعات قالعاندا پتر تەست تاپسىرادى.