ەستافەتا وليمپيادالىق جارىستاردىڭ ءۇش كلاستەرىندەگى 12 جەردە وتەدى
2022 جىلعى بەيجىڭدەگى قىسقى وليمپيادا ويىندارىنىڭ الاۋ جاعۋ ەستافەتاسى 2-4 اقپان ارالىعىندا وتەدى. بۇل تۋرالى «بەيجىڭ-2022» ۇيىمداستىرۋ كوميتەتى مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەستافەتا وليمپيادالىق جارىستاردىڭ ءۇش كلاستەرىندەگى 12 جەردە وتەدى – بەيجىڭنىڭ ورتالىق بولىگىندە، جۇڭگو استاناسىنىڭ سولتۇستىك-باتىسىنداعى يانسين مەگاپوليسىندە جانە چجانسزياكوۋ قالاسىندا (حەبەي پروۆينسياسى). وعان 1200-گە جۋىق ادام قاتىسادى.
«بەيجىڭ-2022» ۇيىمداستىرۋ كوميتەتىنىڭ حابارلاۋىنشا، بەيجىڭدەگى قىسقى وليمپيادا ويىندارىنىڭ الاۋ ەستافەتاسى كوروناۆيرۋستىق پاندەمياعا دەيىنگى الدىڭعى وليمپيادالارداعى ءداستۇرلى الاۋ ەستافەتالارىمەن سالىستىرعاندا الدەقايدا از كولەمدە بولادى.
«ازايتىلعان فورمات ەستافەتانىڭ جۇڭگو استاناسى تۇرعىندارىنىڭ كۇندەلىكتى ومىرىنە اسەرىن ازايتادى جانە پاندەميانىڭ الدىن الۋ جانە باقىلاۋ تالاپتارىنا جاۋاپ بەرە وتىرىپ، مارشرۋت بويىنشا جاپپاي جينالۋدىڭ الدىن الادى»، - دەدى «بەيجىڭ-2022» ۇيىمداستىرۋ كوميتەتى باس حاتشىسىنىڭ ورىنباسارى سيۋي چجيسزيۋنيا.
بەيجىڭدە XXIV قىسقى وليمپيادا ويىندارىنىڭ اشىلۋى قارساڭىندا جۇڭگو استاناسىنىڭ ءبىرقاتار اۋداندارىندا COVID-19 «دەلتا شتامىنىڭ» جانە «وميكرون شتامىنىڭ» تارالۋ وشاقتارى تىركەلدى.
بەيجىڭدە سەنبىدەگى جاعداي بويىنشا كوروناۆيرۋس جۇقتىرعان 34 ادام انىقتالدى. مەگاپوليس بيلىگى وسى جەكسەنبىدە 2 ميلليوننان استام ادام تۇراتىن فەنتاي مەگاپوليسىنىڭ تۇرعىندارىن جاپپاي تەستىلەۋ ناۋقانىن باستادى، جۇقتىرعانداردىڭ ەڭ كوپ سانى (21 ادام) وسىندا انىقتالدى.
الاۋ ەستافەتاسى ءوز جولىن جۇڭگو استاناسىنىڭ ورتالىعىنان سولتۇستىككە قاراي وليمپيادالىق ورمان ساياباعىندا باستايدى، سودان كەيىن قالانىڭ باتىسىنداعى قىسقى وليمپيادا پاركى ارقىلى وتەدى، وندا ۇيىمداستىرۋشىلار ۋادە ەتكەندەي، الاۋ روبوتتارى يۋندين وزەنىنىڭ استىندا وت الماسادى.
3 اقپاندا الاۋ استانالىق يانسين ۋەزىنە جەتكىزىلىپ، وندا ۇلى جۇڭگو قابىرعاسىنىڭ «بادالين» ۋچاسكەسىندە بولادى، سودان كەيىن چجانسزياكوۋ قالاسىنا (حەبەي پروۆينسياسى) بارادى، وندا ەستافەتا چۋنلي ۋەزىنىڭ «فۋلۋن» تاۋ شاڭعىسى كۋرورتىندا وتەدى.
4 اقپاندا، قىسقى وليمپيادا ويىندارىنىڭ اشىلۋ كۇنىندە الاۋ بەيجىڭگە ورالىپ، «يحەيۋان» جازعى يمپەراتور سارايىندا، وليمپيادالىق ورمان ساياباعىندا جانە «گراند-كانال» ساياباعىندا بولادى.
XXIV قىسقى وليمپيادا ويىندارى بەيجىڭدە 2022 جىلعى 4-20 اقپان ارالىعىندا، ال پاراليمپيادا ويىندارى 4-13 ناۋرىز ارالىعىندا وتەدى.