بەيجىڭدە پيلوتسىز تاكسي قىزمەت كورسەتە باستادى

دامىعان زامان

بەيجىڭ قالاسىندا 100 شاقتى اۆتوكولىك پيلوتسىز تاكسي قىزمەتىن كورسەتە باستادى، دەپ حابارلايدى Almaty-akshamy.kz 24.kz-كە سىلتەمە جاساپ

ازىرگە ولار اۋدانى 60 شارشى شاقىرىم ارنايى ايماق اۋماعىندا ادام تاسىمالداپ ءجۇر. بۇل ايماقتاعى جالپى قاشىقتىعى 350 شاقىرىمداي كوشەلەر ارنايى جول بەلگىلەرىمەن جابدىقتالعان. جوبا ازىرلەۋشىلەرى وسىلاي جەرگىلىكتى تۇرعىنداردىڭ كولىكتىڭ بۇل تۇرىنە قىزۋعىشىلىعى قانداي بولاتىنىن تەكسەرمەك.

روبوت-تاكسيدى ارنايى ۇيالى قوسىمشا ارقىلى شاقىرتۋعا بولادى. ءبىر جىلداي ولار جولاۋشىلاردى تەگىن تاسىمالداعان. ەندى قىزمەتى اقىلى بولدى.

پيلوتسىز تاكسيدى رەسمي تۇردە قولدانىسقا ەنگىزۋ ءۇشىن 30 مىڭ جولاۋشىنى جەتكىزىپ، 300 مىڭ شاقىرىم جول ءوتۋى ءتيىس. بەيجىڭ - روبوت-تاكسي ءۇشىن اقى الىپ جاتقان قىتايداعى جالعىز قالا.

تاعى ءتورت ءىرى قالادا ول ءالى سىناقتان ءوتىپ جاتىر. جوبا ازىرلەۋشىلەر ەكى جىلدان كەيىن پيلوتسىز تاكسي قىزمەتىن 30 قالادا ەندىرۋدى كوزدەپ وتىر.

«ءوزىمدى ءقاۋىپسىز سەزىندىم. كادىمگي تاكسيدەن ەرەكشە ايىرماشىلىعى جوق. جۇمىسىن جاڭا عانا باستاعاندىقتان، باعاسى ءالى قىمبات ەكەنىن ءتۇسىندىم. ءبىراق جاڭا پايدالانۋشى رەتىندە ماعان جەڭىلدىك بەرىلدى. سوندىقتان كادىمگى تاكسيدەن گورى از تولەدىم. 700 مەتردەي ءجۇردىم. العاشقى باعاسى 26 يۋان بولعان، جەڭىلدىكپەن نە بارى 4 يۋان تولەدىم. وتە ارزان»، - دەدى بەيجىڭ قالاسىنىڭ تۇرعىنى سياو شيسي.