ا.بايتۇرسىن ۇلى تۋرالى دەرەكتى فيلم كورسەتىلدى
احمەت بايتۇرسىن ۇلىنىڭ 150 جىلدىعى جانە روزا باعلانوۆانىڭ 100 جىلدىعىن مەرەكەلەۋ اياسىندا قازاقستاننىڭ قىتايداعى ەلشىلىگىندە اتاقتى مەرەيتوي يەلەرىنە ارنالعان سالتاناتتى ءىس-شارا ءوتتى، دەپ حابارلايدى Almaty-akshamy.kz ءسىم باسپا ءسوز قىزمەتىنە سىلتەمە جاساپ.
ءىس-شارا اياسىندا قازاق دياسپوراسىنىڭ وكىلدەرى مەن قازاقستاندىق جاس ۇرپاق ءۇشىن ۇلى قازاقستاندىق قايراتكەرلەردىڭ ءومىرى مەن شىعارماشىلىعىنا ارنالعان ءدارىس ۇيىمداستىرىلىپ، قازاق جازۋىنىڭ دامۋىنا ەلەۋلى ۇلەس قوسقان ا.بايتۇرسىن ۇلى تۋرالى دەرەكتى فيلم كورسەتىلدى.
شىعارماشىلىق كەش شەڭبەرىندە ا.بايتۇرسىن ۇلى جانە ر.باعلانوۆانىڭ مەرەيتويلىق كۇندەرىنە ارنالعان پوشتالىق حاتقالتالاردىڭ تۇساۋكەسەرى وتكىزىلدى. اتالعان حاتقالتالاردى ەلشىلىك قىتايلىق «Beijing Diplomatic Gift Co. Ltd.» كومپانياسىمەن بىرلەسىپ باسىپ شىعاردى.
ا.بايتۇرسىن ۇلىنىڭ تانىمال شىعارمالارىن ناسيحاتتاپ، ءان شىرقىراپ بي بيلەگەن قازاقستاندىق جانە جۇڭگو جاستارى مەرەكەلىك ءىس-شاراعا ەرەكشە كوڭىل كۇي سىيلادى.