بەيجىڭ وليمپياداسىنىڭ باستالۋىنا ساناۋلى كۇندەر قالدى
ۇلتتىق وليمپيادالىق كوميتەتتىڭ دەرەگىنشە، رەسمي تۇردە قىسقى ويىندار 4 اقپاندا اشىلعانىمەن، جارىستار 2 اقپاندا باستالىپ كەتەدى، دەپ حابارلايدى Almaty-akshamy.kz
سپورتشىلار تۇراقتايتىن وليمپيادالىق اۋىلمەن تانىستىرادى.
وليمپياداداعى اۋىلدار سانى ۇشەۋ. ويىن وتەتىن ءار كلاستەردە ءبىر اۋىلدان بار. بۇل سپورتشىلارعا ىڭعايلى بولۋى ءۇشىن جاسالعان قادام. ماسەلەن، يانسيندە سىنعا تۇسەتىن سپورتشى جاتىن ورنىنا جەتۋ ءۇشىن ۇزاق ۋاقىت جوعالتۋى مۇمكىن. سوندىقتان، بەيجىڭ، يانسين جانە چجانسزياكوۋدا بىر-بىردەن وليمپيادالىق اۋىل سالىنادى.
ءۇش وليمپيادالىق اۋىلدىڭ جالپى اۋماعى – 330 مىڭ شارشى مەتر. سپورتشىلاردى 20 عيماراتقا ورنالاستىرادى. كەيىننەن بۇل نىساندار تۇرعىن ۇيگە اينالىپ، حالىق يگىلىگىنە بەرىلەدى. ۇيىمداستىرۋشىلار وليمپيادالىق اۋىلدى ەكولوگيالىق تۇرعىدان تازا جانە سەنىمدى ەتىپ سالۋدى كوزدەگەن.
ويىندى ۇيىمداستىرۋشىلاردىڭ مالىمەتىنشە، وليمپيادالىق اۋىل جاسىل قۇرىلىس ستاندارتتارىنا تولىعىمەن ساي كەلەدى. يانسيندەگى قۇرىلىس بارىسىندا 130 جەرگىلىكتى اعاش ساقتالىپ، وليمپيادالىق ورمانعا 24 000 اعاش وتىرعىزىلدى.
وليمپيادالىق اۋىل تولىعىمەن جۇڭگو ستيلىندە بەزەندىلىرگەن. بۇل ويىندى قابىلداۋشى مەملەكەتتى قاتىسۋشىلار جاقسى ءتۇسىنۋ ءۇشىن جاسالدى.
يانسيندەگى اۋىل تەڭىز دەڭگەيىنەن 900 مەتر بيىكتىكتە ورنالاسقان. مۇنداعى كورپۋستاردىڭ بارلىعى دا جىلىتىلعان دالىزدەرمەن جالعاستىرىلعان. دەمەك، سپورتشىلاردىڭ ايازدا سىرتتا جۇرۋىنە جول جوق.
بۇل اۋىلدا نەگىزىنەن تاۋ شاڭعىسىنىڭ وكىلدەرى جايعاسادى. ولار جوعارىدا ورنالاسقان جارىس جولىنا دەيىن ارقان جولمەن بارىپ، قايتار جولدا شاڭعىمەن جەتىپ الادى.
وليمپيادالىق اۋىلداعى بولمەلەر ءارتۇرلى. ءبىر سپورتشىعا، ەكى سپورتشىعا ارنالعان بولمەلەر بار. ءار بولمەدە جىلىتقىش پەن كونديسيونەر ورنالاستىرىلعان. مۇنىڭ ءبارى سمارتفونداعى قوسىمشا ارقىلى باسقارىلادى.
كەرەۋەتتەردى بيىكتىگىنە، ۇزىندىعىنا قاراي رەتتەۋگە بولادى. توكيومەن سالىستىراتىن بولساق، مۇنداعى كەرەۋەتتەر كارتوننان جاسالماعان.
وليمپيادالىق اۋىلدا سپورتپەن شۇعىلدانۋعا بار جاعداي جاسالعان. فيتنەس قۇرالدارىنىڭ 27 ءتۇرى بار، جالپى ەسەبى 139 ترەناجەر قولدانىسقا بەرىلەدى.
فيتنەس-ورتالىق تا تاۋلىك بويى جۇمىس ىستەيدى. بۇدان بولەك، سپورتشىلار دەمالاتىن ورىن، كوفەحانا، بانك دا ورنالاسقان.
ءاربىر وليمپيادالىق اۋىلدا 18 بولىمشەسى بار ۇلكەن اۋرۋحانا جۇمىس ىستەيتىنىن دە ايتا كەتكەن ءجون. ەگەر سپورتشىلاردىڭ بىرىنەن كوروناۆيرۋس انىقتالسا، ونى "جەدەل جاردەممەن" باسقا اۋرۋحاناعا الىپ كەتەدى.
نىسانداردا سپورتشىلارعا بەتپەردە كيىپ، قولىن ءجيى جۋىپ، ارتىق اڭگىمەلەسۋدەن اۋلاق بولۋدى ەسكەرتەتىن روبوتتار بار.
وليمپياداشىلارعا ارنالعان اس ءمازىرى 4 جىل بويى دايىندالدى. قورىتىندى مازىرگە 678 تاعام ەنگەن. وسى ورايدا، ءبىراز جايت ەسەپكە الىندى: ديەتا، ءدىني كوزقاراس جانە تاعى دا باسقا (ۆەگەتەرياندىق اس، حالال تاماق). ارينە، اس مازىرىندە ءداستۇرلى جۇڭگو تاعامدارى دا بار.
اسحاناداعى تاماق ىشەتىن ىدىستار دا ەكولوگيالىق تازا بولىپ ەسەپتەلەدى. پاندەمياعا بايلانىستى اسحانادا سپورتشىلارعا بەتپەردە مەن قولعاپ، سپيرت جاعىلعان ماقتا مەن سانيتايزەرلەر بەرىلەدى.