بەيجىڭ وليمپياداسىندا قازاقستاندىق موگۋلشىلار العاشقى ىرىكتەۋ كەزەڭىن وتكىزدى
جارىستى الدىمەن ايەلدەر باستادى، دەپ حابارلايدى Almaty-akshamy.kz Olympic.kz-كە سىلتەمە جاساپ.
ءبىرىنشى ىرىكتەۋ كەزەڭىنەن سوڭ فينالعا شىعۋ مۇمكىن بولمادى. وتاندىق موگۋلشىلار العاشقى وندىق قاتارىنا ەنە المادى. اياۋلىم امىرەنوۆا 16-شى، ولەسيا گراۋر 23ء-شى ورىندا. اناستاسيا گورودكو جارىس جولىنان شىعىپ كەتكەندىكتەن، فينالعا وتە المادى. ەندى ولار 6 اقپان كۇنى وتەتىن ەكىنشى ىرىكتەۋ سىنىنا قاتىسادى.
«ءبىرىنشى ترامپليننەن سەكىرگەن سوڭ قاتە جىبەردىم. دەسە دە، ءبارى جامان دەپ ايتا المايمىن. وليمپيادا مەرەكەسى سەزىلىپ تۇر، كوڭىل-كۇيىم جاقسى»، - دەدى ولەسيا گراۋر.
«بۇگىنگى كورسەتكىشىم جامان ەمەس. ءبىراق بۇدان دا جاقسى ناتيجە كورسەتەتىن مۇمكىندىك بار ەدى. ءالى بەرىلمەيمىز، ەكىنشى كەزەڭ بار»، - دەيدى اياۋلىم امىرەنوۆا.
«قوبالجۋ بولعان سياقتى. سەكىرۋ دە، باسقاسى دا ويداعىداي شىققان جوق»، - دەدى اناستاسيا گورودكو.
بەيجىڭ وليمپياداسىنىڭ العاشقى جارىس كۇنىندە فريستايل-موگۋلدان ەرلەر اراسىنداعى ىرىكتەۋ سىنى اياقتالدى.
ءبىرىنشى ىرىكتەۋ اينالىمىندا قازاقستاندىق سپورتشىلار العاشقى وندىققا ەنگەن جوق. دميتريي رەيحەرد 75.43 ۇپايمەن 12-ورىن الدى.
پاۆەل كولماكوۆ 74.09 ۇپايمەن 17-ورىندا. ەكى سپورتشىمىز دا 5 اقپان كۇنى وتەتىن ىرىكتەۋ كەزەڭىنىڭ ەكىنشى اينالىمىندا سىنعا تۇسەدى.
ىرىكتەۋ كەزەڭىنىڭ قورىتىندىسى بويىنشا العاشقى وندىققا ەنگەن موگۋلشىلار فينالعا بىردەن جولداما الدى. كانادالىق ميكاەل كينگسبەري 81.15 ۇپايمەن كوش باستاپ كەلەدى.