بەيبىت اتامقۇلوۆ قىرعىزستاننىڭ ەلشىسىمەن كەزدەستى

كەزدەسۋدە كولىك جانە ترانزيتتىك جۇك تاسىمالى سالاسىنداعى ىنتىماقتاستىق ماسەلەلەرى تالقىلاندى.

ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قىرعىزستاننىڭ توتەنشە جانە وكىلەتتى ەلشىسى داستان دۇيشەكەيەۆپەن كەزدەستى، دەپ حابارلايدى Almaty-akshamy.kz

كەزدەسۋدە كولىك جانە ترانزيتتىك جۇك تاسىمالى سالاسىنداعى ىنتىماقتاستىق ماسەلەلەرى تالقىلاندى. اتاپ ايتقاندا، «قىتاي-قازاقستان-قىرعىزستان» باعىتى بويىنشا ترانزيتتىك جۇكتەردىڭ كەدەرگىسىز ءوتۋى، ەلدەرىمىز اراسىنداعى اۋە رەيستەرىنىڭ سانىن ارتتىرۋ، سونداي-اق ترانزيتتىك تەمىرجول جولاۋشىلار تاسىمالىن جاڭعىرتۋ مۇمكىندىگى قاراستىرىلدى.

انىقتاما: 2021 جىلدىڭ 9 ايىندا قازاقستاننىڭ تەمىر جولى ارقىلى ترانزيتپەن جۇك تاسىمالداۋ كولەمى 2% (نەمەسە 53،91 مىڭ تونناعا) ارتىپ، 2 ملن.400 مىڭ توننانى قۇرادى (2020 جىلدىڭ سايكەس كەزەڭىندە - 2 ملن. 347 مىڭ توننا). 2020 جىلى قىتايدان قىرعىزستان باعىتىندا ترانزيتتىك جۇكتەردى تاسىمالداۋ كولەمى 226،6 مىڭ توننانى قۇرادى. 2021 جىلعى 9 ايدا ول كورسەتكىش 41% ۇلعايىپ، 221،9 مىڭ تونناعا جەتتى (2020 جىلدىڭ سايكەس كەزەڭىندە - 157،6 مىڭ توننا).

قازاقستان مەن قىرعىزستان اراسىندا اپتاسىنا 9 اۋە رەيسى ورىندالادى. قازىرگى ۋاقىتتا اپتاسىنا 7 رەت الماتى – بىشكەك جانە اپتاسىنا 2 رەت تۇركىستان – بىشكەك باعىتتارىندا تۇراقتى اۋە رەيستەرى قاتىناپ ءجۇر.