الماتىدا «جىبەك جولى–ءىىى» حالىقارالىق ءبىلىم جارمەڭكەسى ءوتتى
كورمە تۇركيا رەسپۋبليكاسى ساۋدا مينيسترلىگىنىڭ قولداۋىمەن ءوتتى. ءىس-شاراعا تۇركيانىڭ 12 جەكە جانە مەملەكەتتىك ۋنيۆەرسيتەتى مەن 13 قازاقستاندىق ۋنيۆەرسيتەت قاتىستى. بۇل كورمەنىڭ ەرەكشەلىگى – الەمدە تۇڭعىش رەت تۇرىك جانە قازاقستاندىق ۋنيۆەرسيتەتتەر ىنتىماقتاستىق تۋرالى حاتتاماعا قول قويدى.
ءبىلىم جارمەڭكەسىنىڭ ماقساتى – مەكتەپ ءبىتىرۋشى تۇلەكتەر مەن ماگيسترانتتارعا قوس ەلدىڭ جوعارى وقۋ ورىندارىن تانىستىرۋ. ءىس-شارانىڭ اشىلۋىندا تۇركيا رەسپۋبليكاسىنىڭ الماتى قالاسىنداعى باس كونسۋلى ەۆرەن مۋدەرريسوگلۋ مەن ۋنيۆەرسيتەت رەكتورلارى ءسوز سويلەدى.
ۇيىمداستىرۋشىلاردىڭ ايتۋىنشا، بۇل جامەڭكە بۇرىن وتكەن ءىس-شارالاردان ەرەكشە بولماق. سەبەبى، كورمەگە قازاقستاننان دا 13 ۋنيۆەرسيتەت قاتىستى.
«جوعارى سىنىپ وقۋشىلارى مەن ماگيسترانتتار ءۇشىن ماڭىزدى كورمەنى الەم بويىنشا تۇڭعىش رەت الماتىدا وتكىزىپ وتىرمىز. ەكى ەلدىڭ 25 ۋنيۆەرسيتەتىنىڭ باسشىلارىنىڭ قاتىسۋىمەن 250-گە جۋىق ىنتىماقتاستىق تۋرالى قۇجاتقا قول قويىلدى. قوس مەملەكەت اراسىنداعى عىلىمي بايلانىستى نىعايتۋدا اتالعان شارانىڭ ماڭىزى زور»، – دەيدى KZ EXPO باسقارما ءتوراعاسى حاسان وزكاراجالار.
تاقىرىپقا وراي
ەۆرەن مۋدەرريسوگلۋ، تۇركيا رەسپۋبليكاسىنىڭ الماتى قالاسىنداعى باس كونسۋلى:
الەۋمەتتىك ىنتىماقتاستىق ارتادى
جوعارى سىنىپ وقۋشىلارى مەن باكالارۆاريات ستۋدەنتتەرىنە تۇركيادا ءبىلىم الۋ تۋرالى اقپارات بەرۋ جانە تۇركيا مەن قازاقستان ۋنيۆەرسيتەتتەرى اراسىنداعى الەۋمەتتىك ىنتىماقتاستىقتى ارتتىرۋ ءۇشىن ۇيىمداستىرىلدى. تۇرىك ۋنيۆەرسيتەتتەرى حالىقارالىق ارەنادا جەتىستىككە جەتۋدە. تۇركيا قازىرگى ۋاقىتتا ەڭ كوپ شەتەلدىك ستۋدەنتتەر وقيتىن الەمنىڭ ۇزدىك 10 ەلىنىڭ قاتارىنا كىرەدى. تۇركيانىڭ جوعارى وقۋ ورىندارىندا 198 ەلدەن 350 مىڭعا جۋىق ستۋدەنت ءبىلىم الۋدا. جىل سايىن تۇركياعا الەمنىڭ تۇكپىر-تۇكپىرىنەن ءبىلىم ىزدەگەن جاستار اعىلىپ بارىپ جاتادى. وسى ورايدا، قازاقستاندىق باۋىرلارىمىزدىڭ دا تۇركيادا ءبىلىم الۋى بارلىق سالاداعى ىنتىماقتاستىقتى نىعايتادى دەپ ويلايمىن.
بۇگىنگى ءىس-شاراعا قاتىسقان ۋنيۆەرسيتەتتەر ءوزىنىڭ ءبىلىم دەڭگەيى مەن ساپاسىن كورسەتەدى. الداعى ۋاقىتتا ءبىلىم بەرۋ سالاسىندا زەرتتەۋلەرگە باسىمدىق بەرەتىنىمىزدى ايتقىم كەلەدى. مەنىڭ ويىمشا، وسى جارمەڭكەگە قاتىسقان ۋنيۆەرسيتەتتەر قاتىسۋشىلارعا ءبىلىم بەرۋ باعدارلامالارى مەن اكادەميالىق مۇمكىندىكتەرىن ەگجەي-تەگجەيلى تانىستىردى. وسىلايشا ەكى ەل اراسىنداعى ىنتىماقتاستىقتىڭ ودان ءارى دامۋىنا ىقپال ەتەدى.
نۇرلان تۇرسىنبەك ۇلى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى تاريح جانە قۇقىق ينستيتۋتىنىڭ الەۋمەتتىك ءىسى جونىندەگى دەكانىنىڭ ورىنباسارى:
جاستار مۇمكىندىكتى دۇرىس پايدالانۋى كەرەك
ءبىزدىڭ ۋنيۆەرسيتەتتىڭ 4-كۋرس ستۋدەنتتەرى تۇركيا رەسپۋبليكاسىنىڭ الماتى قالاسىنداعى كونسۋلدىعىندا ۆولونتەرلىك قىزمەت اتقارادى. سولاردىڭ بەرگەن اقپاراتى بويىنشا كەلىپ وتىرمىز. جاستارىمىز تۇرىك ەلىندەگى بەدەلدى ۋنيۆەرسيتەتتەردە ءبىلىم الۋىنا جاعداي جاسالىپ جاتقانىنا قۋانىشتىمىن. ءقازىردىڭ وزىندە تۇركيادان باكالاۆر، ماگيستراتۋرا مەن دوكتورانتۋرا بويىنشا ءبىلىم الىپ، ەلگە ورالعان ماماندار كوپ. ماسەلەن، جاقىندا تاريح ماماندىعىنان 2-3 دوكتورانت PhD دوكتورلىق ديسسەرتاسيالارىن قورعاپ كەلدى. وزدەرىڭىز بىلەسىزدەر، تۇركيانىڭ ەۋروپالىق ەلدەرمەن قارىم-قاتىناسى بىزگە قاراعاندا الدەقايدا جاقسى دامىعان. شەتەلدە ءبىلىم الۋ مۇمكىندىگىن دۇرىس پايدالانۋىمىز كەرەك. 
