جەڭىس كۇنىنە 5 كۇن قالدى. «باۋىرجان شيىرشىعى»
9 مامىر قارساڭىندا مادەنيەت جانە اقپارات مينيسترلىگى ۇلى وتان سوعىسىندا قازاقستاندىقتاردىڭ جەڭىسكە قوسقان ۇلەسى تۋرالى جازبالار سيكلىن جاريالاپ ءجۇر. بۇگىنگى سيكل «كەڭەس وداعىنىڭ باتىرى» باۋىرجان مومىش ۇلىنىڭ مايدانداعى ەرلىگىنە ارنالعان، دەپ حابارلايدى aqshamnews.kz.
باۋىرجان مومىش ۇلى ۇلى وتان سوعىسى مايدانىنا تۋرا ماسكەۋ ءۇشىن شايقاستىڭ قىزعان كەزىندە كەلدى. ول الماتىدا قۇرىلعان گەنەرال يۆان ۆاسيليەۆيچ پانفيلوۆ باسقارعان 316-شى اتقىشتار ديۆيزياسىنا ءتۇستى.
باۋىرجان مومىش ۇلى سول كەزدە وفيسەرلىك شەنگە يە بولعان، سوندىقتان بىردەن باتالون كومانديرى قىزمەتىنە تاعايىندالدى. ال 316-شى ديۆيزيانى تىكەلەي ماسكەۋدى قورعاۋعا جىبەردى.
ۆەرماحتتىڭ قاتتى شابۋىلى كەزىندە جاۋدى توقتاتىپ، اسكەردىڭ جەكە قۇرامىن ساقتاپ قالۋ ءۇشىن ەرەكشە تاكتيكالىق امالدار كەرەك بولدى.
سودان بەرى «باۋىرجان شيىرشىعى» دەپ اتالاتىن تاكتيكا ەل ەسىندە قالدى. ونىڭ ءمانى مىناداي ەدى: جاۋدىڭ شابۋىلداۋشى كولونناسىنا كەنەتتەن سوققى بەرىپ، ۇزاق سوعىسقا بارماي، شەگىنىپ وتىرعان. وسىلايشا جاۋدىڭ كۇشى بىرتىندەپ السىرەگەن. سول كەزدە قايتا سوققى بەرىپ، سول سوققى جەڭىسكە جەتكىزگەن.
جاس قازاقتىڭ تاكتيكاسىمەن بەتپە-بەت كەلگەن گەنەرال گوپنەر گيتلەرگە جولداعان بايانداماسىندا بىلاي دەپ جازعان:
«ەشقانداي سوعىس زاڭدارى مەن ەرەجەلەرىن مويىندامايتىن، جابايى ديۆيزيا. ونىڭ ساربازدارى بەرىلمەيدى، ەرەكشە فاناتيزممەن سوعىسادى جانە ولىمنەن قايمىقپايدى».
باۋىرجان مومىش ۇلى بىرنەشە رەت قورشاۋدا قالعان، ءبىراق ءار جولى اسكەرىن دە، وعان سەنىپ تاپسىرىلعان بولىمدەردىڭ جاۋىنگەرلىك قابىلەتىن دە ساقتاپ، ءساتتى شىعا ءبىلدى.
«باۋىرجان شيىرشىعى» بۇگىنگە دەيىن اقش پەن ءيزرايلدىڭ اسكەري وقۋ ورىندارىندا قورشاۋدان شىعۋ كەزىندەگى جاۋىنگەرلىك ءىس-قيمىل ۇلگىسى رەتىندە وقىتىلادى.
باۋىرجان مومىشۇلىنا «كەڭەس وداعىنىڭ باتىرى» اتاعى تەك 1990 جىلى، قايتىس بولعاننان كەيىن بەرىلدى. ول 1982 جىلى دۇنيەدەن ءوتتى.