مەملەكەت باسشىسى قاسىم-جومارت توقايەۆتىڭ تاپسىرماسىن ورىنداۋ جونىندەگى ءىس-شارالار جوسپارىن ىسكە اسىرۋ اياسىندا الماتىدا كولىك ينفراقۇرىلىمىن قالىپتاستىرۋ جۇمىستارى جۇرگىزىلۋدە. بۇل تۋرالى قالا اكىمى ەربولات دوسايەۆتىڭ 2025 جىلى 1-30 ءساۋىر ارالىعىنداعى ەسەبىندە ايتىلدى، دەپ حابارلايدى Aqshamnews.kz
2025 جىلى 23 ساۋىردە رايىمبەك داڭعىلى بويىمەن ۇزىندىعى 17 كم بولاتىن BRT جەلىسىنىڭ قۇرىلىسى باستالدى. ال 2025 جىلى 26 ساۋىردە جەلتوقسان كوشەسى ارقىلى رايىمبەك داڭعىلىنا دەيىن ۇزىندىعى 4،6 كم بولاتىن قوسىمشا جەلىنىڭ قۇرىلىسى قولعا الىندى. بۇل رەتتە «قاسبەتتەن قاسبەتكە دەيىن» ءپرينسيپى بويىنشا كوشە تولىق كوركەيتىلدى.
قازىرگى تاڭدا ينجەنەرلىك جەلىلەردى قايتا ۇيىمداستىرۋ جۇمىستارى جۇرگىزىلىپ جاتىر. قالا تۇرعىندارىنا ىڭعايلى بولۋ ءۇشىن جول قوزعالىسىن ۋاقىتشا قايتا ۇيىمداستىرۋ سىزباسى دايىندالىپ، الەۋمەتتىك جەلىلەر مەن «Almaty Joly» تەلەگرام ارناسى ارقىلى حابارلانىپ وتىر.