ۇلى وتان سوعىسىنداعى ەرلىگى ءۇشىن 500-گە جۋىق قازاقستاندىق كەڭەس وداعىنىڭ باتىرى اتاعىن الدى
ۇلتتىق اسكەري-پاتريوتتىق ورتالىعىندا قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆ رەسەي تاريحي قوعامىنىڭ دەلەگاسياسىمەن كەزدەستى، دەپ حابارلايدى Almaty-akshamy.kz ءقم-نىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا تاراپتار ۇلى وتان سوعىسى جىلدارىنداعى حالىقتىڭ باتىرلىعىن ەستە ساقتاۋ جونىندەگى بىرلەسكەن ءىس-شارالاردى تالقىلادى.
مەملەكەتتىك اسكەري-تاريحي مۋزەيگە قازاقستاندىق جاۋىنگەرلەردىڭ ماسكەۋ شايقاسىنداعى قاھارماندىعى تۋرالى بىرەگەي مۇراعاتتىق قۇجاتتار مەن ماتەريالدار تابىس ەتىلدى.
تىل ەڭبەككەرلەرىنىڭ ەرلىكتەرىن ماڭگى ەستە ساقتاۋعا باعىتتالعان پاتريوتتىق جوبانىڭ تۇساۋكەسەرى اياسىندا رەسەيدىڭ تاريحي قوعامى ۇلى وتان سوعىسىنداعى جەڭىسكە باعا جەتپەس ۇلەس قوسقان قازاقستاننىڭ ەلدى مەكەندەرىنە «داڭقتى ەڭبەك قالاسى» اتاعىن بەرۋدى ۇسىندى. تىزىمگە ون ءبىر قالا كىردى: ولار – نۇر-سۇلتان، الماتى، شىمكەنت، اقتوبە، قاراعاندى، قوستاناي، پەتروپاۆل، سەمەي، تاراز، ورال، وسكەمەن قالالارى.
"ۇلى وتان سوعىسىنداعى جەڭىستىڭ 77 جىلدىعى قارساڭىندا اتا-بابامىزدىڭ ەرلىگىن ەسكە الۋعا دەگەن تۇراقتى باعىتىمىزدى راستايتىن ماڭىزدى ءىس-شارا وتكىزىلۋدە. رەسەيدە قۇرىلعان «داڭقتى ەڭبەك قالاسى» جوباسى قازاقستاندا دا ءتيىستى جالعاسىن تاباتىن بولادى. قازاقستان سوعىس جىلدارىندا «مايدان ارسەنالىنا» اينالعانى، قورعانىس ونەركاسىبىنىڭ نەگىزگى بازاسىن قاجەتتى وتىنمەن قامتاماسىز ەتكەنى، كومىر، ءتۇستى مەتالل وندىرگەنى، شيكىزات جانە ازىق-تۇلىك بازاسىنا اينالعانى، وزىندە ەۆاكۋاسيالانعان 220 فابريكا مەن زاۋىتتى قابىلداعانى بارشاعا ءمالىم"، – دەدى گەنەرال-لەيتەنانت سۇلتان قامالەتدينوۆ.
قازاقستاننان قىزىل اسكەرگە اتتانعانداردىڭ جالپى سانى شامامەن 1 200 000 ادامدى قۇرادى، ولاردىڭ تەڭ جارتىسى سوعىستان ورالمادى. 12ء-شى اتقىشتار جانە 4ء-شى اتقىشتار ديۆيزياسى، 7ء-شى اتقىشتار بريگاداسى جانە پولكتەر مەن باتالونداردىڭ 50-گە جۋىعى ءبىزدىڭ ەلدە قۇرىلدى.
ۇلى وتان سوعىسىنداعى ەرلىگى ءۇشىن 500-گە جۋىق قازاقستاندىق كەڭەس وداعىنىڭ باتىرى اتاعىن الدى.
ودان بولەك، 700 مىڭنان استام ادام ونەركاسىپكە جۇمىلدىرىلدى. كەڭەستەر وداعىنا كىرگەن بارلىق ەلدەن سوعىس جىلدارى قازاقستان 35% مىس، 83% قورعاسىن، 60% موليبدەن، 65% ۆيسمۋت ءوندىردى. قاراعاندى وبلىسى 35 ملن توننا كومىر بەردى. وسى ۋاقىت ىشىندە تىل ەڭبەككەرلەرى 5 ملن توننادان استام نان جانە 700 مىڭ توننادان استام ەت ءوندىردى. ۇلى وتان سوعىسى كەزىندە قىزىل اسكەردىڭ جاۋعا اتقان 10 وعىنىڭ 9-ى قازاقستاندىق قورعاسىننان قۇيىلعانى بارىمىزگە بەلگىلى.