باۋىر وبىرى - ەڭ ءقاۋىپتى ونكولوگيالىق اۋرۋدىڭ ءبىرى. بۇل دەرت كوبىنە بايقالماي دامىپ، كوپ جاعدايدا كەش ساتىسىندا عانا انىقتالادى. ونىڭ تۋىنداۋىنا ىقپال ەتەتىن نەگىزگى ءقاۋىپ فاكتورىنىڭ ءبىرى - ۆ جانە س ۆيرۋستى گەپاتيتتەردىڭ سوزىلمالى ءتۇرى. بۇل ينفەكسيالار ادام اعزاسىندا جىلدار بويى ەشقانداي بەلگى بەرمەي، باۋىردى بىرتىندەپ زاقىمداپ، قاتەرلى ىسىكتىڭ پايدا بولۋىنا قولايلى ورتا قالىپتاستىرادى. بۇل تۋرالى الماتى №36 قالالىق ەمحانانىڭ ونكولوگ دارىگەرى زارينا تويلىبايەۆا ايتىپ بەردى، - دەپ حابارلايدى اqshamnews.kz ءتىلشىسى.
ۆ جانە س گەپاتيتتەرى - قان جانە باسقا دا بيولوگيالىق سۇيىقتىق ارقىلى جۇعاتىن ۆيرۋس ينفەكسيالارى.
اۋرۋ قان قۇيعاندا، ستەريلسىز مەديسينالىق قۇرالدى قولدانعاندا، ينە ارقىلى ەسىرتكى تۇتىنعاندا، تاتۋيروۆكا جاساعاندا، جىنىستىق قاتىناس كەزىندە جۇعۋى مۇمكىن. باستى ءقاۋىپ - كوپتەگەن ادام ءوز بويىندا ۆيرۋس بار ەكەنى تۋرالى بىلمەۋى. ەگەر دەر كەزىندە ەمدەلمەسە، گەپاتيت سوزىلمالى تۇرگە اۋىسىپ، ۋاقىت وتە كەلە سيرروزعا نەمەسە باۋىر وبىرىنا اكەلۋى مۇمكىن.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، العاشقى انىقتالعان باۋىر وبىرى جاعدايىنىڭ 80 پايىزىنا جۋىعى ءدال وسى سوزىلمالى ۆيرۋستى گەپاتيتتەرمەن بايلانىستى.
ۆ جانە س گەپاتيتتەرىنە سكرينينگتەن وتۋگە ءتيىس ادامدار قاتارىنا مەديسينا قىزمەتكەرلەرى (اسىرەسە قانمەن جۇمىس ىستەيتىندەر، ينۆازيالىق پروسەدۋرا جۇرگىزەتىندەر، حيرۋرگيا، ستوماتولوگيا، گينەكولوگيا، گەماتولوگيا جانە زەرتحانا قىزمەتكەرلەرى)، وتا الدىنداعى پاسيەنتتەر، قان قۇيدىرۋعا مۇقتاج ادامدار، ونكولوگيا، گەمودياليز، ترانسپلانتولوگيا جانە باسقا دا بولىمشەدە ەم الىپ جاتقاندار كىرەدى. سونداي-اق جۇكتى ايەلدەر مەن ءومىر سالتىنا بايلانىستى ايتۆ مەن گەپاتيتكە شالدىعۋ ءقاۋپى جوعارى ادامدار جاتادى.
بۇل اۋرۋدىڭ زۇلىمدىعى - باۋىر زاقىمدالعانىن ۇزاق ۋاقىت بويى تەڭگەرىپ تۇرۋى.
ادام ەشقانداي اۋىرسىنۋ نە جايسىزدىق سەزىنبەۋى مۇمكىن. السىزدىك، وڭ جاق قابىرعا استىنىڭ اۋىرلاۋى، تابەتتىڭ تومەندەۋى، تەرىنىڭ سارعايۋى سياقتى بەلگىلەر تەك اۋرۋ اسقىنعان كەزدە عانا بىلىنەدى. ال بۇل كەزەڭدە ەمدەۋ قيىنداي ءتۇسىپ، ساۋىعۋ مۇمكىندىگى دە تومەندەيدى.
اۋرۋدىڭ الدىن الۋعا بولادى. ول ءۇشىن ءبىرىنشى كەزەكتە ەكپە الۋ قاجەت.
B گەپاتيتىنە قارسى ەكپە - ق ر ۇلتتىق ەكپە كۇنتىزبەسىنە ەنگىزىلگەن جانە تەگىن سالىنادى. وكىنىشكە قاراي، س گەپاتيتىنە قارسى ۆاكسينا ءالى جوق. سوندا دا بۇل اۋرۋ ەرتە انىقتالسا، ەمدەۋگە كەلەدى.
ەسىڭىزدە بولسىن: سكرينينگتەن ءوتۋ مەن تۇراقتى تەكسەرىلىپ تۇرۋ - دەنساۋلىققا سانالى قاراۋدىڭ بەلگىسى. اۋرۋدى ەرتە انىقتاۋ - گەپاتيت پەن باۋىر وبىرىنىڭ الدىن الۋدىڭ ەڭ ءتيىمدى جولىنىڭ ءبىرى.
"ەگەر ءسىز بۇرىن-سوڭدى ۆ جانە س ۆيرۋستى گەپاتيتتەرىنە اناليز تاپسىرماساڭىز نەمەسە B گەپاتيتىنە قارسى ەگىلگەنىڭىزگە سەنىمدى بولماساڭىز، تۇرعىلىقتى جەرىڭىز بويىنشا ەمحاناڭىزعا بارىپ كەڭەس الىڭىز. كەيدە ءبىر قاراپايىم تالداۋ - دەنساۋلىعىڭىز بەن ءومىرىڭىزدى ساقتاپ قالۋعا كومەكتەسۋى مۇمكىن"، - دەپ تۇيىندەدى ءسوزىن زارينا تويلىبايەۆا.