الماتىلىق دارىگەرلەر وتا جاساپ، ەحينوكوكك قۇرتىنا تولى كيستا مەن الىپ ءوت قابىن الىپ تاستادى
42 جاستاعى ەر ادام الماتىداعى قالالىق شۇعىل كومەك كورسەتۋ اۋرۋحاناسىنا جەتكىزىلگەن كەزدە اۋىر حالدە بولدى. ول ءىش قۋىسىندا وسكىن پايدا بولىپ، ءىشى ۇلكەيىپ كەتكەنىن، السىزدىك بايقالىپ، قىزۋى كوتەرىلەتىنىن، ءىشىنىڭ ءجيى-جيى تولعاق قىسقانداي اۋىراتىنىن ايتىپ شاعىمدانعان.
ناۋقاستىڭ سوزىنشە، 2021 جىلى تەكسەرۋ بارىسىندا باۋىردىڭ وڭ جاق بولىگىندە ەحينوكوكك كيستاسى بارى انىقتالعان. ءبىراق ءوزى وتا جاساتۋدان باس تارتىپتى. ۋاقىت وتە كەلە ءىشى ۇلكەيىپ، ءىش قۋىسىنداعى وسكىن ءوسىپ كەتكەندىكتەن جوسپارلى وتا جاساۋ ءۇشىن اۋرۋحاناعا جەتكىزىلدى. ونىڭ ۇستىنە، وتتەگى تاس، كالكۋلەزدى حولەسيستيت پەن 28ح20 سانتيمەترلىك الىپ ءوت قابى جاعدايدى قيىنداتا تۇسكەن. 2،5 ساعاتتىق وتانى حيرۋرگتەر نۇرحات ەسەنبەكوۆ پەن داۋرەن ابدۋالييەۆ، انەستەزيولوگ بەللا باجينوۆا، مەدبيكە لاشىن بولىسبايەۆا قاتىسقان بريگادا جاسادى.
«ادەتتە، ەرەسەك ادامدا ءوت قابىنىڭ ۇزىندىعى 7-10 سم، ەنى 5 سم توڭىرەگىندە، سوپاقشا نەمەسە المۇرت تارىزدەس ءپىشىندى بولىپ كەلەدى. ال بۇل ناۋقاستىڭ ءوت قالتاسى نورمادان 3-4 ەسە ۇلكەن جانە ءىش قۋىسىنىڭ جارتىسىنا جۋىعىن الىپ جاتتى. مۇنداي جاعدايدى ءوز باسىم العاش رەت كەزدەستىرىپ وتىرمىن. قالىپتان تىس الىپ ءوت قابى مەن باۋىرعا جابىسقان ەحينوكوكك كيستاسى ەرەكشە كلينيكالىق جانە پاتولوگيالىق جاعداي بولىپ ەسەپتەلەدى. ودان تەك حيرۋرگيالىق وپەراسيا ارقىلى عانا ارىلۋعا بولادى»، - دەيدى حيرۋرگ نۇرحات ەسەنبەكوۆ.
پاسيەنت وتادان كەيىن جەتىنشى كۇنى اۋرۋحانادان شىقتى. جالپى قۇنى 400 مىڭ تەڭگەدەن اسىپ جىعىلاتىن وپەراسيا ءمامس قاراجاتىنا جاسالدى.
ەستەرىڭىزگە سالا كەتسەك، باۋىر ەحينوكوككوزى – جۇقپالى پارازيتارلىق اۋرۋ. Echinococcus قۇرتى ادەتتە باۋىرعا جابىسىپ، كيستا پايدا بولادى. حيرۋرگيالىق ەمدى تالاپ ەتەتىن بۇل اۋرۋ ونداعان جىلدار بويى ەشبىر بەلگى بەرمەۋى مۇمكىن. قۇرتقا تولى كيستانى ءىش قۋىسىنا كومپيۋتەرلىك توموگرافيا جاساعاندا نەمەسە ەحينوكوكقا يفا ادىسىمەن اناليز تاپسىرعاندا عانا انىقتاۋعا بولادى. سوندىقتان اسىرەسە، جانۋارلارمەن جۇمىس ىستەيتىن ادامدارعا ءجيى قارالىپ تۇرعان ءجون، دەيدى ماماندار.
دارىگەرلەر باستى پروبلەما اۋرۋدىڭ وتە كەش انىقتالاتىنىندا بولىپ تۇرعانىن، ەحينوكوكك جۇقتىرىپ الماس ءۇشىن قاراپايىم تازالىق تالاپتارىن ساقتاۋ قاجەتتىگىن ايتادى.
«پاندەميادان كەيىن ءبىز دەنساۋلىعىمىزعا دەن قويا باستادىق. ءبىراق كوروناۆيرۋستان دا باسقا اۋرۋلار بارىن ۇمىتپاي، قولدى سابىنداپ جۋىپ جۇرگەن ابزال»، - دەپ قورىتتى دارىگەر.