باكۋدا تۇركى الەمىنىڭ مادەني مۇراسى تۋرالى كونۆەنسيا دايىندالماق

كەزدەسۋلەر شەڭبەرىندە ساراپتامالىق توپتاردىڭ قاتىسۋىمەن كەڭەستەر ءوتتى، «تۇركى الەمىنىڭ مادەني مۇراسى تۋرالى كونۆەنسيانى» دايىنداۋ بويىنشا ۇسىنىستار ۇسىنىلدى، تۇركى مەملەكەتتەرى باسشىلارىنىڭ تۇركى ىنتىماقتاستىعى ۇيىمدارىنىڭ الدىنا قويعان جانە «TURKTIME» باعدارلامالىق قۇجاتىندا بەلگىلەنگەن مىندەتتەرى تالقىلاندى.

جينالىستى اشقان قور پرەزيدەنتى اقتوتى رايىمقۇلوۆا «تۇركى الەمىنىڭ كەلەشەگى – 2040» اياسىندا «تۇركى الەمىنىڭ مادەني مۇراسى تۋرالى كونۆەنسيانى» ازىرلەۋ بويىنشا قورعا جۇكتەلگەن جۇمىس باستالعانىن اتاپ ءوتتى.

وتىرىستىڭ كۇن تارتىبىنە «تۇركى الەمىنىڭ مادەني مۇراسى تۋرالى كونۆەنسيانى» دايىنداۋ، قوردىڭ الداعى ەكى جىلعا ارنالعان جوسپارىن قاراۋ جانە ۇيىم جانىنان تۇركى الەمىنىڭ ساۋلەت رەستاۆراتورلارى مەن تاريحشىلارىنىڭ كونسۋلتاتيۆتىك كەڭەسىن قۇرۋ سەكىلدى ماسەلەلەر ەنگىزىلدى.

قاتىسۋشىلارعا «تۇركى الەمىنىڭ مادەني مۇراسى تۋرالى كونۆەنسيا» جوباسى ۇسىنىلدى. مەملەكەتتىك ورگانداردىڭ وكىلدەرى، ساراپتامالىق توپتار مەن قور قىزمەتكەرلەرى قۇجاتتى جەتىلدىرۋ جانە ءوزارا قىزىعۋشىلىق تۋدىراتىن ماسەلەلەر بويىنشا پىكىر الماستى.

كەڭەستە، سونداي-اق، قورعا مۇشە ەلدەردىڭ وتىنىمدەرى مەن تۇركى الەمىنىڭ باي مۇراسىن ىلگەرىلەتۋ، قورعاۋ جانە قالپىنا كەلتىرۋ جونىندەگى جوبالاردى قامتيتىن جوبا جەتەكشىلەرىنىڭ ۇسىنىستارى نەگىزىندە قوردىڭ ەگجەي-تەگجەيلى ەكى جىلدىق قىزمەت جوسپارى (Action Plan) قارالدى.

ەكى كۇن ىشىندە كەزدەسۋلەر ءوزارا پىكىر الماسۋمەن جانە ۇسىنىستاردى ەنگىزۋمەن قاتار ءجۇردى. ايتا كەتۋ كەرەك، قور مۇنداي ۇيلەستىرۋ كەڭەستەرىن بۇدان ءارى دە كەلىسىلگەن شەشىمدەر قابىلداۋ ءۇشىن وتكىزەدى.

ەسكە سالايىق، اتالمىش قور 2012 جىلعى 23 تامىزدا بىشكەكتە تۇركى مەملەكەتتەرى ۇيىمى پرەزيدەنتتەر كەڭەسىنىڭ وتىرىسىندا قۇرىلدى. قوردىڭ ماقساتى تۇركى مادەنيەتى مەن مۇراسىن ساقتاۋعا، زەردەلەۋگە جانە ناسيحاتتاۋعا باعىتتالعان باعدارلامالار مەن جوبالاردى قولداۋ جانە قارجىلاندىرۋ بولىپ تابىلادى.