الماتى قالاسىنىڭ ەكولوگيا جانە قورشاعان ورتا باسقارماسىنا قاراستى «مەدەۋ» مەملەكەتتىك وڭىرلىك تابيعي ساياباعى باۋم توعايىندا 104 429 اعاش جانە 5081 بۇتا بار ەكەنىن حابارلايدى.
ولاردىڭ بارلىعى مەملەكەتتىك ورمان قورى ساناتىنا جاتادى جانە ەرەكشە قورعالاتىن تابيعي اۋماقتىڭ ءبىر بولىگى، - دەپ حابارلايدى Aqshamnews.kz.
قازاق ۇلتتىق اگرارلىق زەرتتەۋ ۋنيۆەرسيتەتى مەن ق ر اشم ورمان شارۋاشىلىعى عىلىمي-يننوۆاسيالىق ينستيتۋتى جۇرگىزگەن تۇگەندەۋ دەرەكتەرىنە سايكەس، ساۋ ەكپەلەر – 55%، السىرەگەن – 23%، ءوسىمى تەجەلگەن – 12%، قۋراۋ باستاعاندار – 8%، قۋراپ بىتكەن جانە اپاتتى جاعدايداعىسى – ءارقايسىسى 1%. وسىلايشا، اپاتتى جاعدايداعى اعاشتاردىڭ ۇلەسى جالپى سانىنىڭ 9%-دان ءسال عانا اسادى. بۇل باق-تا بۇرىن تارالعان «48% اعاش كەسىلەدى» دەگەن اقپاراتتى جوققا شىعارادى.
سونىمەن قاتار 2026 جىلى اۋماقتى اباتتاندىرۋ اياسىندا توعايدىڭ جاسىل قورىن نىعايتۋ جانە تابيعي شىعىنداردى وتەۋ ءۇشىن مىڭنان استام جاڭا اعاش وتىرعىزۋ باعدارلاماسى ىسكە اسىرىلادى.
اعاشتاردى سانيتارلىق ساۋىقتىرۋ – بۇل اۋرۋ، قۋراپ قالعان جانە زاقىمدانعان بۇتاقتاردى كەسۋ، زيانكەستەر مەن اۋرۋلارعا قارسى كۇرەس بويىنشا كەشەندى ءىس-شارا. نەگىزگى ادىستەرى: سانيتارلىق ماقساتتا كەسۋ، ەكپەلەردى وڭدەۋ جانە اعاش ءدىڭىنىڭ اينالاسىن الدىن الۋ تازالاۋ. بۇل شارالار اعاشتاردىڭ ساۋلىعىن، ءپىشىنىن جانە ۇزاق تىرشىلىك ەتۋدى ساقتاۋعا باعىتتالعان.
توعايداعى جۇمىستار تابيعي ورتاعا بارىنشا از ارالاسۋ قاعيداتىمەن اتقارىلادى. اباتتاندىرۋدا سەمەنت-بەتون بۇيىمدارىن قولدانباي، ەكولوگيالىق ماتەريالدار پايدالانىلادى. ەكولوگيالىق جۇرگىنشى جولاقتارى مەن ەنەرگوۇنەمدەگىش جارىقتاندىرۋ ورناتىلادى، سونداي-اق كەلۋشىلەردىڭ قاۋىپسىزدىگىن قامتاماسىز ەتۋ ءۇشىن پوليسيا بەكەتتەرى مەن بەينەباقىلاۋ جۇيەلەرى قاراستىرىلادى.
توعايدى قالپىنا كەلتىرۋ جۇمىستارى قاتار جۇرۋدە. 2023 جىلى ەرىكتىلەر سيۆەرس الماسى مەن جاپىراقتى تۇقىمداردىڭ 1430 كوشەتىن، 2024 جىلى ەمەن، شىرشا جانە ورىك اعاشتارىنىڭ 720 كوشەتىن وتىرعىزدى. جۇمىس ەرىكتىلەر مەن دەمەۋشىلەر ەسەبىنەن، بيۋدجەت قاراجاتىن تارتپاي جۇزەگە اسىرىلۋدا.
وسىلايشا، باۋم توعايىنداعى بارلىق ءىس-شارا تەك بىرەگەي تابيعي اۋماقتى ساقتاۋ، ساۋىقتىرۋ جانە قالپىنا كەلتىرۋگە باعىتتالعان. ماقسات – توعايدىڭ الماتى تۇرعىندارىنىڭ سۇيىكتى دەمالىس ورنى ءارى قالانىڭ جاسىل نىشانى بولىپ قالا بەرۋىن قامتاماسىز ەتۋ.
قالا تۇرعىندارى مەن ب ا ق وكىلدەرىن تەك رەسمي ءارى تەكسەرىلگەن دەرەككوزدەرگە - ەكولوگيا جانە قورشاعان ورتا باسقارماسىنىڭ مالىمەتتەرىنە، «مەدەۋ» مەملەكەتتىك وڭىرلىك تابيعي ساياباعىنىڭ اقپاراتى جانە جوباعا قاتىسۋشى عىلىمي ينستيتۋتتاردىڭ دەرەكتەرىنە سۇيەنۋلەرىڭىزدى سۇرايمىز.