باتىس قازاقستاندا مال ولەكسەلەرى جويىلۋدا

باتىس قازاقستان وبلىسىندا سۋعا كەتكەن ەلدى مەكەندەر اۋماعىندا مال ولەكسەلەرىن جيناۋ جانە جويۋ جۇمىستارى جۇرگىزىلىپ جاتىر.

بقو ۆەتەريناريا باسقارماسىنىڭ باسپا ءسوز قىزمەتىنەن ءمالىم ەتكەنىندەي، اۋدان اكىمدىكتەرى جانىنان قۇرىلعان كوميسسيا ۇسىنعان اقپاراتقا سايكەس وبلىستا 236 باس ءىرى قارا (ءبورلى اۋدانىندا - 33، قاراتوبەدە - 79، سىرىمدا - 68، تەرەكتىدە - 56)، 1 677 ۇساق مال (بايتەرەكتە - 1، بورلىدە - 226، قاراتوبەدە - 949، سىرىمدا - 322، تەرەكتىدە - 179)، 51 جىلقى (بورلىدە - 40، قاراتوبەدە - 3، سىرىمدا - 8)، بايتەرەكتە 7 باس شوشقا جانە 81 ءۇي قۇسىنىڭ (قاراتوبەدە - 74، سىرىمدا - 7) ولگەنى راستالدى، دەپ حابارلايدى Almaty-akshamy.kz.

مال ولەكسەلەرىن جويۋ بيولوگيالىق قالدىقتاردى جويۋ قاعيدالارىنا سايكەس جەر ترانشەيالارىندا (شۇڭقىرلاردا) ورتەۋ جولىمەن جۇرگىزىلىپ جاتىر.

ولەكسەلەردى جيناۋ جانە جويۋ جۇمىستارىنا ۆەتەريناريالىق ينسپەكسيا، ۆەتەريناريالىق ستانسيا جانە رەسپۋبليكالىق ەپيزووتياعا قارسى وترياد (رەقو) قىزمەتكەرلەرى جۇمىلدىرىلدى.

«كۇنى بۇگىنگە دەيىن وبلىس بويىنشا 230 باس ءىرى قارا، 1 677 ۇساق مال، 51 جىلقى، 7 شوشقا، 81 ءۇي قۇسىنىڭ ولەكسەلەرى جويىلدى. ولەكسەلەر جاتقان اۋلالار مەن قورا-جاي ورىندارىن ۆەتەريناريالىق ستانسيا مەن رەقو قىزمەتكەرلەرى «گليۋزامين» دەزينفەكسيالىق قۇرالىمەن زالالسىزداندىرۋ جۇمىستارىن جۇرگىزۋدە»، - دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن سۋ باسقان اۋماقتاردا جۇقپالى اۋرۋ جۇقتىرماۋ ءۇشىن نە ىستەۋ كەرەكتىگىن جازعان بولاتىنبىز. سونداي-اق باتىس قازاقستاندا سۋ باسقان جەرلەردە ىشەك اۋرۋلارى تىركەلگەن جوق.