قاتتى جەل تۇرىپ، اينالانى اپاي-توپاي ەتتى
سونداي-اق ورال قالاسىنىڭ كەيبىر ىقشام اۋداندارىندا سۋ جوق. بۇعان تابيعاتتىڭ مىنەز تانىتۋى سەبەپ، دەپ حابارلايدى Almaty-akshamy.kz.
حابار 24ء-تىڭ مالىمەتىنشە، وڭىردە اۋا تەمپەراتۋراسى 5 گرادۋس سۋىق. قاتتى جەل تۇرىپ، اينالانى اپاي-توپاي ەتتى. قولايسىز كۇن رايى كوممۋنالدىق جەلىلەرگە زاقىم كەلتىرىپ جاتىر. ءقازىردىڭ وزىندە اقجايىق، بايتەرەك، تاسقالا، ءبورلى، جانىبەك، جاڭاقالا اۋداندارى جانە ورال قالاسىنىڭ تەڭ جارتىسى جارىقسىز وتىر.
«اپاتتى جويۋ جۇمىستارى جۇرگىزىلىپ جاتىر. ەلەكتر جەلىلەرىنە جاۋاپتى كومپانيا تاراپىنان 32 ادام مەن 15 ارنايى تەحنيكا جۇمىلدىرىلدى»،-دەيدى بقو تجد باسپا ءسوز قىزمەتى.
سونىمەن قاتار وبلىس ورتالىعىنىڭ كەيبىر شاعىن اۋداندارىندا اۋىز سۋ توقتاپ قالدى.
«قولايسىز اۋا رايى سالدارىنان جەراستى سۋتارتقىسىنىڭ سورعى ستانسيالارىنداعى كەرنەۋدىڭ تومەندەۋىنە بايلانىستى سورعىلار بۇزىلدى. قالالىق سۋ قۇبىرى جەلىلەرىندەگى قىسىم تومەندەدى. قازىرگى ۋاقىتتا جوندەۋ جۇمىستارى جۇرگىزىلۋدە»،-دەيدى ورال قالاسىنىڭ سۋمەن قامتۋ كاسىپورىنى.