تۇرعىن ۇيلەر مەن اۋلا ايماقتاردان 57 مىڭ تەكشە مەتر ەرىگەن قار سۋى سورىلدى
كۇننىڭ كۇرت جىلىنۋى سالدارىنان ەلىمىزدىڭ بارلىق وڭىرلەرىندە سۋ تاسقىنى ءقاۋپى بار. بۇگىنگى تاڭدا باتىس قازاقستان، اقتوبە جانە پاۆلودار وبلىستارىندا جاعداي كۇردەلى. ەلىمىزدە قالىپتاسقان سۋ تاسقىنى جاعدايىنا بايلانىستى تجم مەن وڭىرلەردە جەدەل شتابتار جۇمىس جۇرگىزۋدە، دەپ حابارلايدى Almaty-akshamy.kz.
«باتىس قازاقستان وبلىسىنا ەرىگەن قار سۋىن سورىپ شىعارۋ ءۇشىن ماڭعىستاۋ وبلىسىنان قوسىمشا كۇشتەر مەن قۇرالدار جىبەرىلدى. ولاردىڭ جالپى سانى - 43 ادام، 4 بىرلىك تەحنيكا مەن 6 سۋ سورۋ قۇرالى»،-دەلىنگەن ق ر تجم باسپا ءسوز قىزمەتى تاراتقان مالىمەتتە.
قۇزىرلى ۆەدومستۆو مالىمەتىنشە، باتىس قازاقستان وبلىسى قاراتوبە اۋدانىنىڭ شالعىن كەنتىندە جانە ءبورىلى اۋدانىنىڭ قىزىلتال اۋىلىندا 37 جەكە تۇرعىن ءۇي مەن ەكى الەۋمەتتىك نىساندى قىزىل سۋ باستى. تجم جانە جەرگىلىكتى اتقارۋشى ورگانداردىڭ كۇشتەرى 87 ادامدى ءقاۋىپسىز جەرگە ەۆاكۋاسيالادى. بۇگىنگى كۇنى باتىس قازاقستان وبلىسىنىڭ ەلدىمەكەندەرىنەن 1 ملن 156 مىڭ تەكشە مەتر قار شىعارىلدى. تۇرعىن ۇيلەر مەن اۋلا ايماقتاردان 57 مىڭ تەكشە مەتر ەرىگەن قار سۋى سورىلدى.
«سونداي-اق، مينيسترلىكتىڭ حابارلاۋىنشا، پاۆلودار وبلىسىندا روجدەستۆەنكا اۋىلىنداعى ەكى جەكە تۇرعىن ءۇيدى قىزىل سۋ باستى. بۇگىنگى كۇنى تۇرعىن ۇيلەر مەن اۋلا اۋماقتارىنان 56 500 تەكشە مەتر سۋ سورىلدى، ەلدىمەكەندەردەن 795 مىڭ تەكشە مەتر قار شىعارىلدى»،-دەلىنگەن حابارلامادا.
اقتوبە وبلىسىندا 47 اۋلا اۋماقتى قىزىل سۋ باستى. ەلدىمەكەندەردەن 345 مىڭ تەكشە مەتر قار شىعارىلدى. تۇرعىن ۇيلەر مەن اۋلا اۋماقتاردان 5 808 تەكشە مەتر سۋ سورىلدى. سونىمەن قاتار، اقتوبە وبلىسىندا سەگىز اۆتوجول ۋچاسكەسىندە قىزىل سۋ تاسىپ جاتىر. اقتوبە جانە باتىس قازاقستان وبلىستارىندا ءبىر رەسپۋبليكالىق ماڭىزى بار اۆتوجول ۋچاسكەسى مەن 15 جەرگىلىكتى ماڭىزى بار اۆتوجولداردىڭ ۋچاسكەسىن سۋ شايدى. بارلىق ۋچاسكەلەردە پوليسيا قىزمەتكەرلەرى مەن جەرگىلىكتى اتقارۋشى ورگانداردىڭ كەزەكشىلىگى ۇيىمداستىرىلدى.
وسى جۇمىستارعا تجم، ءىىم جانە جەرگىلىكتى اتقارۋشى ورگانداردان بارلىعى 621 ادام، 289 بىرلىك تەحنيكا جۇمىلدىرىلعان.