باتۋميدە ازيا مادەنيەتىنىڭ فەستيۆالى باستالدى

گرۋزيانىڭ باتۋمي قالاسى سان ءتۇرلى مادەنيەت پەن وركەنيەتتى توعىستىرعان ورتالىققا اينالدى.

باتۋميدە ازيا مادەنيەتىنە ارنالعان فەستيۆال باستالدى. سارى قۇرلىق ەلدەرى باس قوسقان بۇل شارادا ءار مەملەكەت ءوزىنىڭ ۇلتتىق تاعامى مەن كيىمىن، ادەت-عۇرپى مەن ويىن-ساۋىق ءداستۇرىن تانىستىردى، دەپ حابارلايدى Almaty-akshamy.kz 24.kz-كە سىلتەمە جاساپ.

«مەن باتۋميگە جۇڭگو شايىنىڭ قالاي دايىندالاتىنىن كورسەتۋ ءۇشىن كەلدىم. فەستيۆال قوناقتارىنا ءبىز ۇسىنعان شاي مەن تاعامدار ۇناعانداي بولدى. جالپى ءبىز گرۋزيادا ازيا ەلدەرى تاعامدارىنىڭ تانىمال بولعانىن قالايمىز. مۇنداعى ماقساتىمىز – ءباتۋميدىڭ ەكونوميكاسى ورلەپ، ءتۋريزمىنىڭ تۇلەۋىنە كومەكتەسۋ»، - دەيدى ساتۋشى.

فەستيۆالدىڭ نەگىزگى يدەياسى – ءدىنى مەن ءدىلى، كوزقاراسى مەن تالعامى بولەك ازاماتتارعا تەك ازيا ەلدەرىنە ءتان قۇندىلىقتار مەن قاسيەتتەردى كورسەتۋ. سونىمەن قاتار ايماققا كوپتەپ تۋريست تارتۋدىڭ ءبىر جولى.

«فەستيۆال 6 ايماققا بولىنگەن. ونىڭ ىشىندە تاماقتانۋ، ويىن-ساۋىق، كينو مەن تاعى دا باسقا الاڭدار بار. كەشكىسىن تەگىن كونسەرت وتەدى. بۇل فەستيۆال بۇعان دەيىن جۇڭگو جەرىندە ۇيىمداستىرىلدى. ەندى، مىنە، باتۋميدە شىمىلدىعىن ءتۇرىپ، تۋريستەردى قارسى الىپ وتىر»، - دەيدى ازيا فەستيۆالىن ۇيىمداستىرۋشى تاتۋلي جانجگاۆا.

اۋقىمدى شارا قىركۇيەكتىڭ 30-ىنا دەيىن جالعاسادى. ياعني، قارا تەڭىزدەگى تۋريستىك ماۋسىمنىڭ ەڭ ءتاتتى كەزەڭى اياقتالعانعا دەيىن جۇمىس ىستەيدى.