بۇل تۋرالى باس پروكۋرور ايتتى.
قازاقستاننىڭ باس پروكۋرورى بەرىك اسىلوۆ ءماجىلىستىڭ جالپى وتىرىسىندا قاڭتار وقيعاسى بويىنشا تەرروريزم اكتىلەرى بويىنشا 46 قىلمىستىق ءىس تەرگەلىپ جاتقانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۆەدومستۆوارالىق جەدەل تەرگەۋ توبى 4 باعىتتى پىسىقتاۋدا. ءبىرىنشى. ۇيىمداستىرۋ جانە قاتىسۋ. جاپپاي تارتىپسىزدىكتەر بويىنشا 44 قىلمىستىق ءىس تەكسەرىلىپ جاتىر. اقتوبە جانە جامبىل وبلىستارىندا 9 ۇيىمداستىرۋشى قاماۋعا الىندى. ولار تارتىپسىزدىكتەرگە، مەملەكەتتىك جانە كوممەرسيالىق نىسانداردى قيراتۋعا شاقىردى دەگەن كۇدىككە ءىلىندى. تارتىپسىزدىكتەرگە قاتىسۋشىلارعا قاتىستى 15 قىلمىستىق ءىس قوزعالدى. وسى ىستەر بويىنشا 527 ادام كۇدىكتى رەتىندە وتۋدە. 278 ادام قاماۋعا الىندى»، - دەدى باس پروكۋرور ءماجىلىستىڭ جالپى وتىرىسىندا.
سونداي-اق، ول جاپپاي تارتىپسىزدىك پەن تەرروريزم اكتىلەرىنىڭ ايىرماشىلىعى نەدە ەكەنىن ءتۇسىندىردى.
«ەكىنشى. تەرروريزم اكتىلەرى بويىنشا 46 قىلمىستىق ءىس تەرگەلۋدە. بارلىق ايىپتالۋشىلار بويىنشا جەدەل ىزدەستىرۋ شارالارى جۇرگىزىلۋدە. بۇل جەردە جاپپاي تارتىپسىزدىك پەن تەرروريزم اكتىلەرىنىڭ ايىرماشىلىعى نەدە ەكەنىن تۇسىندىرگىم كەلەدى. تارتىپسىزدىكتەر مەن تەرروريستىك شابۋىلدار كەزىندە زورلىق-زومبىلىق، قيراتۋ، قارۋلى قارسىلىق ورىن الادى. ءبىراق تارتىپسىزدىكتەر رەتسىز، بيلىككە ەشقانداي تالاپتار قويىلمايدى. ءوز كەزەگىندە تەرروريستىك اكتىلەردىڭ ماقساتى – حالىقتى قورقىتۋ جانە مەملەكەتتىك ورگانداردىڭ قىزمەتىن ادەيى توقتاتۋ. بيلىككە تالاپتار قويىلادى، ستراتەگيالىق وبەكتىلەر، بيلىك پەن قۇقىق قورعاۋ ورگاندارى قارۋ-جاراقپەن باسىپ الىنادى نەمەسە جويىلادى»، - دەدى بەرىك اسىلوۆ.