سوڭعى بەس ايدا پروكۋرورلار 100 مىڭعا جۋىق كاسىپكەردىڭ قۇقىعىن قورعاعان
بۇل تۋرالى مەملەكەت باسشىسى قاسىم-جومارت توقايەۆ اقوردادا كاسىپكەرلەرمەن كەزدەسۋ بارىسىندا ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
"بيزنەس پەن مەملەكەت مۇددەلەرى اراسىنداعى تەڭگەرىمدى قاتاڭ ساقتاۋ كەرەك.ول ءۇشىن كەلەسى قادامداردى ورىنداۋ قاجەت.رەتتەۋشى ورگاندار قىزمەتىنىڭ رەپرەسسيالىق سيپاتىن تومەندەتۋ ءۇشىن جۇيەلى شارالار قاجەت. قۇقىق قورعاۋ ورگاندارى تاراپىنان ورىنسىز قۋدالاۋلار، قىسىمدار ءالى دە ساقتالىپ وتىرعانى تۋرالى كوپتەگەن بەلگى بار. سوڭعى بەس ايدا پروكۋرورلار 100 مىڭعا جۋىق كاسىپكەردىڭ قۇقىعىن قورعادى، بۇل بۇكىل 2021 جىلعى كورسەتكىشپەن بىردەي. بۇل فاكتىلەر تەرگەۋ ورگاندارىنىڭ بيزنەستى قىلمىستىق قۋدالاۋ وربيتاسىنا تاباندى تۇردە تارتىپ جاتقانىن بىلدىرەدى"، - دەدى ول.
پرەزيدەنت اتاعانداي، باس پروكۋراتۋراعا كاسىپكەرلىك سۋبەكتىلەرىنە قاتىستى باقىلاۋ-قاداعالاۋ جانە اسىرەسە تەرگەۋ ارەكەتتەرىن زاڭسىز جۇرگىزۋ فاكتىلەرىنىڭ الدىن الۋدى بارىنشا قاتاڭ باقىلاۋدى قامتاماسىز ەتۋ قاجەت.
«سونداي-اق كاسىپكەرلەردى كۇدىكتى دەپ تانۋ كەڭ اۋقىمدى تاجىريبە بار، ال شىن مانىندە بۇل تەك مۇلىكتىك داۋلار.بۇگىندە كەز كەلگەن تىركەلگەن ارىز اۆتوماتتى تۇردە قىلمىستىق ءىستىڭ قوزعالۋىن بىلدىرەدى. بۇل كاسىپكەردىڭ قىزمەتىن توقتاتادى، ينۆەستيسيانى توقتاتادى، ىسكەرلىك بەدەلگە كولەڭكە تۇسىرەدى. ونىڭ ۇستىنە سوتقا دەيىنگى تەرگەۋ ۇزاق ۋاقىتقا سوزىلۋى مۇمكىن. بۇل وقىس وقيعا ەمەس، ادال ەمەس ءتارتىپ ساقشىلارىنىڭ مۇددەسى ءۇشىن جۇمىس ىستەيتىن جۇيە. مۇنداي مىسالدار كوپ»، - دەدى توقايەۆ.
پرەزيدەنتتىڭ ايتۋىنشا، قۇقىق قورعاۋ ورگاندارى ءوز كۇشتەرىن ءبىرىنشى كەزەكتە الاياقتىقتى، اقشانى جىلىستاتۋدى، زاڭسىز اقشا تابۋدى جانە قارجى پيراميدالارىن سالۋدى اشۋعا باعىتتاۋى كەرەك.
«ءبىز كولەڭكەلى ەكونوميكامەن باتىل كۇرەسۋىمىز كەرەك.ازاماتتىق ينسپەكتورلاردىڭ قىزمەتىن قاتاڭ رەتتەدىك. تاۋەكەلدەردى باسقارۋ جۇيەسى، تەكسەرۋ پاراقتارى جانە پروفيلاكتيكالىق باقىلاۋلار ەنگىزىلدى. قۇقىق قورعاۋ ورگاندارىنا قاتىستى نەگە بۇل ىستەلمەيدى؟»، - دەدى ول.