باس پروكۋراتۋرا ەل بويىنشا بالالار لاگەرىنە تەكسەرىس باستادى

بالالاردىڭ تۇراتىن جەرى مەن ايماقتا سانيتارلىق-ەپيدەميولوگيالىق نورمالاردىڭ ساقتالۋىنا نازار اۋدارىلادى. 

الماتى قالاسىنىڭ پروكۋراتۋراسى بالالار لاگەرىن ۇيىمداستىرۋ كەزىندە كامەلەتكە تولماعانداردى تاربيەلەۋ جونىندەگى وكىلەتتىكتەردى تەرىس پايدالانۋ جانە مىندەتتەردى ورىنداماۋ فاكتىلەرى بويىنشا سوتقا دەيىنگى تەرگەپ-تەكسەرۋدى باستادى، دەپ حابارلايدى Almaty-akshamy.kz.

بۇل جايىندا  باس پروكۋراتۋرانىڭ باسپا ءسوز قىزمەتى مالىمدەدى.

وقۋ-اعارتۋ مينيسترلىگىنىڭ مالىمەتىنشە، بۇگىندە ەلىمىزدە 848 لاگەر جۇمىس ىستەيدى، ونىڭ ىشىندە 118 – مەملەكەتتىك، 100 – جەكەمەنشىك، 630 – شاتىرلى دەمالىس ورنىن ۇيىمداستىرۋشىلارعا تيەسىلى. سونداي-اق، ماۋسىم ايىندا 10216 مەكتەپ جانىنداعى لاگەر جۇمىس جاسادى.

جازدا بالالاردىڭ قۇقىقتارىنىڭ ىقتيمال بۇزىلۋىن ەسكەرە وتىرىپ، باس پروكۋروردىڭ تاپسىرماسى بويىنشا اۋماقتىق پروكۋرورلار ۋاكىلەتتى ورگاندارمەن بىرلەسىپ مەملەكەتتىك، جەكە جانە شاتىرلى لاگەرلەردىڭ قىزمەتىن تەكسەرۋگە كىرىستى.

شارا بارىسىندا بالالاردىڭ تۇراتىن جەرى، ايماقتا سانيتارلىق-ەپيدەميولوگيالىق نورمالاردىڭ ساقتالۋى، ءورت قاۋىپسىزدىگى، تاماق جانە مەديسينالىق كومەكپەن قامتاماسىز ەتۋ جاعدايى تەكسەرىلەدى.

بيىل بالالاردىڭ جازعى دەمالىسىن ۇيىمداستىرۋ بويىنشا قىزمەتتەردى ساتىپ الۋ كەزىندە زاڭدىلىقتى ساقتاۋ ماسەلەلەرى زەرتتەلۋدە.

ەسكە سالايىق، وتكەن اپتادا  «حالىقتىڭ الەۋمەتتىك جاعىنان وسال توپتارى» ساناتىنداعى الماتىلىق مەكتەپ وقۋشىلارى بالالار لاگەرىنە تەگىن جولداما العان. الايدا ولار ۇزىناعاش اۋىل ماڭىنداعى ساۋنا عيماراتىنا ورنالاستىرىلعانى جازىلعان بولاتىن.