بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ايتىلدى.
قازاقستان مۇسىلماندارى ءدىني باسقارماسىنىڭ ءتوراعاسى، ەلىمىزدىڭ باس ءمۇفتيى ناۋرىزباي قاجى تاعان ۇلى رامازان ايىندا ازىق-تۇلىك باعاسىنا جەڭىلدىك جاساۋدى ۇسىندى، دەپ حابارلايدى Almaty-akshamy.kz
«رامازان ايىندا ادامدارعا كوپ جاقسىلىقتار جانە مۇمكىندىكتەر بەرىلەدى. بۇل تۋرالى ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «بۇل ايدا ءجاننات ەسىكتەرى اشىلادى»، «ورازا تۇتقان ادامنىڭ الدىڭعى جانە كەيىنگى كۇنالارى كەشىرىلەدى» دەگەن ءسۇيىنشى حابار جەتكىزگەن. ەندەشە، قاسيەتتى ايدا كوبىرەك ساۋاپتى امال جاساۋعا اسىعايىق، اعايىن! اتا-انامىزدىڭ، قازىنالى قارتتارىمىزدىڭ دۇعاسى مەن العىسىن الۋعا تىرىسايىق!» - دەدى ناۋرىزباي قاجى تاعان ۇلى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
سونداي-اق، باس ءمۇفتي قازاقستاندىقتاردى مۇمكىندىككە قاراي، مۇقتاج جاندارعا قول ۇشىن بەرىپ، ناۋقاستىڭ كوڭىلىن سۇراپ، ساۋاپ الۋعا شاقىردى.
«وسى رەتتە كاسىپكەر ازاماتتاردى قاسيەتتى ايدىڭ قۇرمەتى ءۇشىن حالقىمىزدىڭ تۇرمىس جاعدايىن ەسكەرىپ، الەۋمەتتىك ماڭىزى بار تاۋارلار مەن ازىق-تۇلىك باعاسىن مۇمكىندىگىنشە 10 پايىزعا دەيىن تومەندەتىپ، جەڭىلدىك جاساۋعا شاقىرامىن. ءبىز قاشان دا وزگەلەرگە قايىرىمدىلىق جاساپ، اينالامىزعا شۋاعىمىزدى توگىپ، شاراپاتىمىزدى تيگىزىپ، ادامنىڭ العىسىن الىپ وسىپ-ونگەن ەلمىز. حالقىمىزدا «قايىرىمدىلىق جاساساڭ، قايىرىن ءوزىڭ كورەسىڭ» دەگەن ناقىل ءسوز بار»، - دەيدى ول.