باس ءمۇفتي قازا تاپقان كەنشىلەردىڭ تۋىستارىنا كوڭىل ايتتى

بۇدان بۇرىن قاراعاندى وبلىسىنداعى «اباي» شاحتاسىندا بولعان مەتان گازىنىڭ جارىلۋى سالدارىنان 6 كەنشىنىڭ قازا تاپقانىن حابارلاعانبىز.

قمدب ءتوراعاسى، باس ءمۇفتي ناۋرىزباي قاجى تاعان ۇلى قاراعاندى وبلىسىنىڭ «اباي» شاحتاسىنداعى جارىلىستان قازا تاپقان شاحتەرلەردىڭ جاقىندارى مەن تۋىستارىنا كوڭىل ايتتى، دەپ حابارلايدى Almaty-akshamy.kz مuftyat.kz سايتىنا سىلتەمە جاساپ.

«قاراعاندى وبلىسىنداعى بولعان قايعىلى جاعدايدى اۋىر قابىلدادىم. «اباي» شاحتاسىندا بولعان مەتان گازىنىڭ جارىلۋى سالدارىنان قانشاما وتباسى قارا جامىلدى. جارىلىس سالدارىنان قاراپايىم جۇمىسشىلار – شاحتەرلەر قازا تاپتى. ءوزىمنىڭ جانە قازاقستان مۇسىلماندارى ءدىني باسقارماسى اتىنان جارىلىستان دۇنيە سالعان ازاماتتاردىڭ تۋعان-تۋىستارى مەن جاقىندارىنا قايعىلارىنا ورتاقتاسىپ، كوڭىل ايتامىن. سونداي-اق جارىلىستان زارداپ شەككەن، جاراقات العان ازاماتتاردىڭ تەزىرەك ساۋىعىپ كەتۋىن تىلەيمىن. جاراتقان جار بولسىن!» دەلىنگەن جەدەلحاتتا.

ايتا كەتەيىك، 7 قاراشا كۇنى تاڭدا «اباي» شاحتاسىندا مەتان گازى جارىلدى. بۇل ۋاقىتتا شاحتادا 64 ادام جۇمىس ىستەپ جاتقان. ونىڭ 54ء-ى ەۆاكۋاسيالاندى. اپات سالدارىنان 6 كەنشى قازا تاۋىپ، 2 ادام اۋىر جاراقات الدى.