بۇگىن قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى نۇر-سۇلتان قالاسىنداعى وقۋشىلار سارايىنىڭ عيماراتىندا ورنالاسقان №59 رەفەرەندۋم ۋچاسكەسىنە بارىپ، داۋىس بەردى، دەپ حابارلايدى almaty-akshamy.kz قازاقپاراتقا سىلتەمە جاساپ.
«بۇگىن وسى ەلدىڭ ازاماتى رەتىندە ادىلەتتى، جاڭا قازاقستان قۇرۋ جولىندا جاسالىپ جاتقان يگى باستامالاردى قولداپ، رەفەرەندۋمعا قاتىسىپ، ءوز تاڭداۋىمدى جاسادىم. ءبىز ەل بولاشاعىن جارقىن ەتۋ جولىنداعى تاريحي قادامداردى قولدايمىز جانە حالىقتى بىرلىك پەن ىنتىماققا ۇندەيمىز. بۇگىنگى رەفەرەندۋم جورالى جۇرتىمىزدىڭ بىرلىگى مەن بەرەكەسى ءۇشىن وڭ سەرپىن بەرەدى دەگەن سەنىمدەمىن. اللا تاعالا ەلىمىزگە اماندىق، جۇرتىمىزعا تىنىشتىق ءناسىپ ەتىپ، تاۋەلسىزدىگىمىزدى باياندى ەتكەي. ءامين»، - دەدى باس ءمۇفتي ناۋرىزباي قاجى تاعان ۇلى بۇقارالىق اقپارات قۇرالدارىنا بەرگەن سۇحباتىندا.