قاسيەتتى رامازان ايىنىڭ باستالۋىنا ساناۋلى كۇندەر قالدى.
باس ءمۇفتي ورازا كەزىندە ازىق-تۇلىك باعاسىن 10 پايىزعا دەيىن تومەندەتۋگە شاقىردى، دەپ حابارلايدى Almaty-akshamy.kz.
«بيىل ءپىتىر مولشەرى 535 تەڭگە بولىپ بەلگىلەندى. ءپىتىر ساداقانىڭ مولشەرى ەلىمىز بويىنشا 2 كەلى ۇننىڭ ورتاشا باعاسىمەن ەسەپتەلدى. ال ۇننىڭ باعاسى قمدب-نىڭ قالا جانە وبلىس وكىلدىكتەرىنىڭ بەرگەن مالىمەتى نەگىزىندە انىقتالدى. ءپىتىر ساداقاسىن قۇرما، مەيىز باعاسىمەن دە بەرۋگە بولادى»، – دەدى باس ءمۇفتي.
2023 جىلى رامازان ايى 23 ناۋرىزدا باستالادى. ءساۋىر ايىنىڭ 17-سىنەن 18-ىنە قاراعان ءتۇن – قاسيەتتى ءقادىر ءتۇنى. 21 ءساۋىر – ورازا ايت مەرەكەسى.
باس ءمۇفتي ورتالىق ازيا ەلدەرىنىڭ مۇفتيلەرىمەن، ونداعى ءپاتۋا سالاسىنا جاۋاپتى عالىمدارمەن اقىلداسا كەلە جانە عىلىمي زەرتتەۋلەر ناتيجەسى ەسكەرىلىپ، ورتاق شەشىم قابىلدانعانىن حابارلادى.
«وسى رەتتە كاسىپكەر ازاماتتاردى، ساۋدا ورتالىقتارىنىڭ باسشىلارىن قاسيەتتى ايدىڭ قۇرمەتى ءۇشىن حالقىمىزدىڭ تۇرمىس جاعدايىن ەسكەرىپ، الەۋمەتتىك ماڭىزى بار تاۋارلار مەن ازىق-تۇلىك باعاسىن مۇمكىندىگىنشە 10 پايىزعا دەيىن تومەندەتىپ، جەڭىلدىك جاساۋعا ۇندەيمىن. بارشا قاۋىمعا قاسيەتتى رامازان ايىندا اراق-شاراپ ىشىلمەسە جانە دۇكەندەردە ساتىلماسا، مۇمكىندىگىنشە قۇدايى استار كەشكى اۋىزاشار ۋاقىتىندا وتكىزىلسە دەگەن تىلەگىمدى جەتكىزەمىن»، – دەدى ناۋرىزباي قاجى تاعان ۇلى.