ءبىلىم الۋ ءۇشىن كۇش-جىگەر، تالاپ-تالپىنىس قاجەت.
قمدب ءتوراعاسى، باس ءمۇفتي ناۋرىزباي قاجى تاعان ۇلى ءبىلىم كۇنىمەن قۇتتىقتادى، دەپ حابارلايدى Almaty-akshamy.kz باسقارمانىڭ باسپا ءسوز قىزمەتىنە سىلتەمە جاساپ.
قۇرمەتتى قاۋىم!
بارشا مەكتەپ وقۋشىلارى مەن ستۋدەنتتەردى، مۇعالىمدەر مەن ءبىلىم سالاسىنىڭ قىزمەتكەرلەرىن، سونىڭ ىشىندە «نۇر-مۇباراك» ۋنيۆەرسيتەتىنىڭ، مەدرەسە-كوللەدجدەردىڭ ۇستازدارى مەن شاكىرتتەرىن 1 قىركۇيەك – ءبىلىم كۇنىمەن شىن جۇرەكتەن قۇتتىقتايمىن! بولاشاقتىڭ ىرگەسىن قالايتىن شاكىرتتەرگە جاڭا وقۋ جىلىندا تابىس پەن بەرەكە تىلەيمىن!
ءبىلىم الۋ ءۇشىن كۇش-جىگەر، تالاپ-تالپىنىس قاجەت. سوندا عانا العان ءبىلىمنىڭ ناتيجەسى بولادى. اسىل دىنىمىزدە مۇسىلمانداردىڭ ءبىلىم الۋى – مىندەت. اللا تاعالا «الاق» سۇرەسىندە: «وقى! جاراتقان راببىڭنىڭ اتىمەن وقى! ول (اللا) ادامدى ۇيىعان قاننان جاراتتى. وقى! سەنىڭ ءتاڭىرىڭ ەڭ ارداقتى! ول قالاممەن جازۋ ۇيرەتتى. ادامدارعا بىلمەگەنىن ۇيرەتتى»، – دەيدى.
ارداقتى پايعامبارىمىز (وعان اللانىڭ سالاۋاتى مەن سالەمى بولسىن) دا: «ءبىلىم الۋ مۇسىلمان ەر مەن ايەلگە – پارىز»، – دەپ ءبىلىم الۋدىڭ دىندەگى ورنى ەرەكشە ەكەنىن ەسكەرتكەن. سوندىقتان ءبىزدىڭ ءعىلىم-بىلىم ۇيرەنىپ، بىلگەنىمىزدى باسقالارعا ۇيرەتۋىمىز – پارىز. سەبەبى، حاديستەردەن جەتكەندەي، ءبىلىمدى جايۋ – اللا جولىندا جاسالعان ۇلكەن ساداقا. سونىمەن قاتار ءبىلىم – باقىتتىڭ كىلتى، ءجانناتقا جەتەلەيتىن ۇلكەن نىعمەت. ءبىلىمدى ادامنىڭ بۇ دۇنيەدە دە، و دۇنيەدە دە ءجۇزى جارىق.
ماحمۇد ءقاشعاريدىڭ: «ۇلىم ساعان ايتايىن وسيەتىن دانانىڭ، ءبىلىمدىنى تانى دا، سوڭىنان ەر، قاراعىم» دەسە، شاكارىم قاجى قۇدايبەردى ۇلى: «تالاپتان دا ءبىلىم مەن ونەر ۇيرەن، ءبىلىمسىز، ونەرسىز بولادى اقىل تۇل»، – دەگەن. سەبەبى اقىلدى اسىل ەتەتىن – ءبىلىم.
ەندەشە، شاكىرتتەرىمىزدىڭ ءبىلىم جولىنداعى قادامىنا نۇر جاۋسىن دەپ تىلەيمىن! جاراتۋشى يەمىز ولاردىڭ العان ءبىلىمىن كادەگە اسىرىپ، ەلىمىز بەن جەرىمىزدىڭ بولاشاعى ءۇشىن قىزمەت ەتۋىن ءناسىپ ەتسىن! ءامين!