قازاقستان ۇلتتىق بانكى نومينالى 500 تەڭگەلىك «شىعىس كۇنتىزبەسى» مونەتالار سەرياسىنان «بارىس جىلى» كوللەكسيالىق مونەتالارىن اينالىمعا شىعارادى، دەپ حابارلايدى almaty-akshamy.kz قازاقپاراتقا سىلتەمە جاساپ.
التىن جانە كۇمىس مونەتالاردىڭ ديزاينىندا «شىعىس كۇنتىزبەسى» سۋبۇرقاعىنىڭ (الماتى) ساۋلەت ەلەمەنتتەرى پايدالانىلعان. مۇسىندىك كومپوزيسيانى سۋرەتشى-مونۋمەنتاليست ۆ. تۆەردوحلەبوۆ ا. تاتارينوۆپەن جانە ۆ. كاسيەۆپەن بىرلەسىپ جاساعان. «بارىس جىلى» مونەتالارىنىڭ وڭ بەتىندە اسپان الەمىندەگى جۇلدىزدار كارتاسىندا جۇلدىزدار شوعىرىنىڭ ميفولوگيالىق سيمۆولى بەينەلەنگەن. سونداي-اق مونەتا دايىندالعان مەتالل، ونىڭ سىناماسى مەن ماسساسى جازىلعان.
شاقانى اينالدىرا «قازاقستان رەسپۋبليكاسى» جانە «REPUBLIC OF KAZAKHSTAN» دەگەن جازۋلار، كۇننىڭ ستيلدەندىرىلگەن بەينەسى جانە مونەتانىڭ نومينالى بەينەلەنگەن.
مونەتالاردىڭ تەرىس بەتىندە شىعىس كۇنتىزبەسى بويىنشا 2022 جىلدىڭ سيمۆولى – بارىس بەينەسى بەينەلەنىپ، اينالدىرا «2022»، «شىعىس كۇنتىزبەسى»، «ۆوستوچنىي كالەندار» جانە «ORIENTAL CALENDAR» دەپ جازىلعان.
ىشكى جاعىندا شىعىس كۇنتىزبەسىنىڭ قالعان ون ءبىر سيمۆولى ورنالاسقان. التىن مونەتالار 999/1000 سىنامالى. ماسساسى – 7،78 گرامم، ديامەترى – 21،87 مم، دايىنداۋ ساپاسى – «proof»، نومينالى 500 تەڭەك، تارالىمى – 1 مىڭ دانا.
كۇمىس مونەتالار 925/1000 سىنامالى، ماسساسى – 31،1 گرامم، ديامەترى - 38،61 مم، دايىنداۋ ساپاسى – «proof»، نومينالى – 500 تەڭگە، تارالىمى – 3 مىڭ دانا.
ايتا كەتەيىك، اتالمىش ەكى مونەتا دا كوللەكسيالىق قۇنى بويىنشا ساتۋعا ارنالعان. ولار قازاقستان رەسپۋبليكاسىنىڭ بۇكىل اۋماعىندا ناقتى قۇنىمەن تولەمنىڭ بارلىق تۇرلەرى بويىنشا، سونداي-اق بانك شوتتارىنا ەسەپتەۋ، اۋدارىم جاساۋ ءۇشىن قابىلدانۋعا، قازاقستان رەسپۋبليكاسىنىڭ بارلىق بانكتەرىندە ۇساقتالۋعا جانە ايىرباستالۋعا جاتادى.
التىن جانە كۇمىس مونەتالار كادەسىي وراماسىمەن شىعارىلادى، مەملەكەتتىك، ورىس جانە اعىلشىن تىلدەرىندەگى قۇب نومىرلىك ساپا سەرتيفيكاتىمەن جابدىقتالعان. كوللەكسيالىق مونەتالار قازاقستان تەڭگە سارايىندا دايىندالدى.