ءبارى – بۇلدىرشىندەردىڭ باقىتتى بولاشاعى ءۇشىن
الماتى مەملەكەتتىك قۋىرشاق تەاترى وتباسىلىق قۇندىلىقتاردى نىعايتۋ، بالالارعا قۋانىشقا تولى ساتتەر سىيلاۋ ماقساتىندا قىزىقتى سپەكتاكلدەر كورسەتىلىمى مەن تۇراقتى مادەني-تانىمدىق ءىس-شارالار ۇيىمداستىرىپ كەلەدى.
ۇلتتىق قۋىرشاق ونەرىن جاڭعىرتا ءتۇسۋ ارقىلى بۇلدىرشىندەردىڭ ءداستۇرلى ونەرگە، مادەني تاريحىمىزدى بىلۋگە دەگەن قىزىعۋشىلىعىن تۋدىرۋ باعىتىندا جاڭا سپەكتاكلدەر دايىندالۋ ۇستىندە. قۋىرشاق تەاترى مەملەكەتتىك مەرەكەلەر قارساڭىندا كورەرمەندەر نازارىنا تەگىن ماستەر-كلاستار، مەرەكەلىك ەفيرلەر، ويىن-ساۋىقتىق ايدارلار مەن تانىمدىق بەينەجازبالار ۇسىنۋدى قولعا العان.
سونىمەن قاتار، جىل سايىن بالالاردى قورعاۋ كۇنى مەرەكەسى اياسىندا مەرەكەلىك باعدارلاما مەن الەۋمەتتىك جاعدايى تومەن، مۇمكىندىگى شەكتەۋلى بالالارعا قايىرىمدىلىق اكسياسىن ۇيىمداستىرۋ داستۇرگە اينالعان. تەاتر ۇجىمى تەك بالالارعا ارنالعان سپەكتاكلدەر ەمەس، ەرەسەكتەرگە ارنالعان قويىلىمدار ساحنالاۋىمەن دە قازاق قۋىرشاق ونەرىن الەمدىك كەڭىستىكتە كەڭىنەن ناسيحاتتاپ كەلەدى.
تەاتر ءار جىلدارى كوپتەگەن فەستيۆالدەرگە قاتىسىپ، جۇلدەلى ورىندارعا يە بولىپ، قازاق قۋىرشاق ونەرىنىڭ دامۋىنا ۇزدىكسىز ۇلەس قوسۋدا. بيىل دا بىرنەشە رەسپۋبليكالىق جانە حالىقارالىق تەاتر فەستيۆالدەرىنە شاقىرتۋ الدى.
اتاپ ايتقاندا، تۇركيانىڭ كونيا قالاسىندا وتەتىن «مىڭ تىنىس، ءبىر داۋىس» XIII حالىقارالىق تەاتر فەستيۆالى، مولدوۆا رەسپۋبليكاسى كيشينيەۆ قالاسىنداعى «پود شاپكوي گۋگۋسە» قۋىرشاق تەاترلارىنىڭ فەستيۆالى، رەسەي فەدەراسياسى، نوۆوسيبيرسك قالاسىندا وتەتىن «پەرەكرەستوك» قۋىرشاق تەاترلارىنىڭ فەستيۆالىنە جانە اقتوبە قالاسىندا وتەتىن V «BALAUSA» ەكسپەريمەنتالدى سپەكتاكلدەر فەستيۆالىنە تەاتر ۇجىمى شاقىرتۋ الدى.
ءتۇرلى تەاتر فەستيۆالدەرىنەن بولەك، رەپەرتۋارعا قوسىلاتىن ءاربىر جاڭا سپەكتاكل دە كورەرمەندەرىمىزدىڭ قاتارىن ارتتىرىپ، قۋىرشاق ونەرىن كەڭىنەن ناسيحاتتاۋعا باعىتتالۋدا. 20 جىلدان اسا كورەرمەندەردىڭ سۇيىكتى قويىلىمىنا اينالىپ، ۇزدىكسىز ساحنالانىپ جۇرگەن «تۇراقتى قويىلىمدار كورسەتىلىمى» وسى سوزىمىزگە دالەل. ودان بولەك، تەاتردىڭ ءتولقۇجاتىنا اينالعان «قۋىرشاق-دۋمان»، «توبا» قويىلىمدارى بالالاردىڭ ءوز وتباسى مەن وتانىن سۇيۋىنە ىقپال ەتەدى. وتباسى ينستيتۋتىن نىعايتۋعا جانە وتباسى قۇندىلىقتارىن جاس ۇرپاقتىڭ بويىنا سىڭىرۋگە باعىتتالعان قويىلىمدار كورسەتىلىمى كورەرمەندەر نازارىنا ۇزدىكسىز ۇسىنىلىپ كەلەدى.
وتكەن عاسىردا ىرگەتاسى قالانعان الماتى مەملەكەتتىك قۋىرشاق تەاترى بۇگىنگە دەيىن قۋىرشاق ونەرىنىڭ جۇيەسىن مەڭگەرىپ، تاريحي كەزەڭدەردى باسىنان وتكەردى. سول قۇندىلىقتاردى كوزىمىزدىڭ قاراشىعىنداي ساقتاپ، ۇرپاق يگىلىگى ءۇشىن بىلىكتى جۇمىس ىستەۋ – پارىزىمىز. كورەرمەندەردىڭ سۇرانىسىن قاناعاتتاندىرا وتىرىپ، الەۋمەتتىك پاراقشالار ارقىلى دا تەاترعا كورەرمەندەردى قىزىقتىرۋ جۇمىستارىن جۇرگىزىپ كەلەمىز. جەلىدەگى جارنامالار ارقىلى بالالاردى شەكسىز اقپارات الەمىنەن پايدالى دۇنيەلەرگە قىزىقتىرۋ – ماقساتىمىز. سونىمەن قاتار، ءبىلىم مەكەمەلەرىمەن، بالاباقشالارمەن جۇمىس ىستەپ كەلەمىز. ەرتەڭ ەل تۋىن جەلبىرەتەر بۇلدىرشىندەردىڭ باقىتتى بولاشاعى ءۇشىن ەڭبەكتەنۋ – بارشامىزعا ورتاق مىندەت. ەل ەرتەڭىنە قامقور بولايىق!
المات ابدراحمانوۆ،
مەملەكەتتىك قۋىرشاق تەاترى ديرەكتورىنىڭ مىندەتىن اتقارۋشى.