تۇركىستان وبلىسىنداعى جەتىساي اۋداندىق سوتىندا قارت اكەسىن جۇيەلى تۇردە سوققىعا جىقتى دەپ ايىپتالعان ەر ادامعا قاتىستى رەزونانستى ءىس اياقتالۋعا جاقىن. 15 قاڭتاردا ايىپتالۋشى سوڭعى ءسوزىن ايتتى، دەپ حابارلايدى اqshamnews.kz ءتىلشىسى.
سوت وتىرىسى بارىسىندا ايىپتالۋشى ەموسياسىن جاسىرا الماي، جىلاپ جىبەردى. ول ءوز كىناسىن تولىق مويىنداپ، كوپشىلىك پەن تۋىستارىنان كەشىرىم سۇرادى.
"بارشاڭىزدان، بۇكىل قازاق حالقىنان كەشىرىم سۇرايمىن. ىستەگەن ىسىمە شىن جۇرەكتەن وكىنەمىن. تۋىستارىمنان كەشىرىم وتىنەمىن. اشۋعا بەرىلىپ كەتتىم. ءومىر بويى وكىنىپ وتەمىن. قاتەلەستىم. بارشا مۇسىلمان حالقىنان كەشىرىم سۇرايمىن. مەنى ءتۇسىنىپ، كەشىرۋلەرىڭىزدى وتىنەمىن. كىنامدى تولىق مويىندايمىن"، – دەدى ول سوتتا.
بۇعان دەيىن پروكۋرور ايىپتالۋشىعا 6 جىل 2 اي باس بوستاندىعىنان ايىرۋ جازاسىن سۇراعان.
بۇل ءىس وتكەن جىلدىڭ قىركۇيەگىندە الەۋمەتتىك جەلىدە تاراعان ۆيدەوعا بايلانىستى قوعام نازارىن اۋدارعان. كادرلاردا ەر ادامنىڭ ءوز اۋلاسىندا قارت اكەسىن اياۋسىز سوققىعا جىققانى بەينەلەنگەن. بەينەجازبانى كورشى ايەل جاسىرىن تۇردە تۇسىرگەن.
ۆيدەودا قاريانىڭ بەتى قانعا بويالعانى، وزدىگىنەن تۇرا الماعان سوڭ، ۇلىنىڭ ايەلىن شاقىرىپ، ەكەۋىنىڭ ونى ۇيگە الىپ كىرگەنى كورىنەدى. كەيىنىرەك قارت كىسىنىڭ قايتىس بولعانى بەلگىلى بولدى.
پوليسيا ەرلى-زايىپتىعا قاتىستى قىلمىستىق ءىس قوزعاعانىمەن، ايەلگە "ۇرىپ-سوعۋ" بابى بويىنشا قوزعالعان ءىس دالەلدىڭ جەتكىلىكسىزدىگىنە بايلانىستى توقتاتىلعان.