بارماعىن قولىنا اۋىستىرىپ سالدى

الماتىدا 1،5 جاسار بالاعا اياق بارماعى قولىنا اۋىستىرىپ سالىندى.

الماتىدا №2 بالالار قالالىق كلينيكالىق اۋرۋحاناسى (بۇدان ءارى - №2 بقكا) بازاسىندا اياقتارى مەن قولدارىندا سيرەك پاتولوگياسى بار بالالارعا وتا جاسالدى.

№2 بقكا تراۆماتولوگ-ميكروحيرۋرگتارى جانە الەمگە ايگىلى ميكروحيرۋرگ، ماسكەۋ قالاسىنىڭ رحدۋ تراۆماتولوگيا جانە ورتوپەديا كافەدراسىنىڭ پروفەسسورى يگور گولۋبيەۆپەن بىرگە 6 پاسيەنتكە وتا جاسالدى.
"مەيىرىمدىلىك "ەرىكتى قوعامدىق قورى" مەن الماتى قالاسى قوعامدىق دەنساۋلىق ساقتاۋ باسقارماسىنىڭ ۇيىمداستىرۋىمەن وتكەن  ءۇش كۇندىك ماستەر-كلاسس اياسىندا كۇردەلى ميكروحيرۋرگيالىق وتالار جاسالدى.

تۋا بىتكەن جانە جۇرە پايدا بولعان اقاۋلارى بار التى قازاقستاندىق بالانىڭ اياق-قولدارىنا جاسالعان وتالار ءساتتى اياقتالدى. 

بالانىڭ اجەسى ميرا قاليبەكوۆا بىلاي دەدى:
"مەنىڭ نەمەرەمنىڭ تۋىلعان كەزدە وڭ قولىنىڭ بىلەگى بولمادى، ال سول قولىنىڭ باس بارماعى تولىق دامىماعان بولدى. قىزىم "مەيىرىمدىلىك" قوعامدىق قورىنا جۇگىندى، تەكسەرۋدەن كەيىن دارىگەرلەر  اياقتىڭ بارماعىن سول قولعا اۋىستىرىپ سالۋعا بولاتىنىن ايتتى. بۇل وعان سول جاق قولىمەن كرۋجكانى ۇستاۋعا، سول قولدى تولىعىمەن پايدالانۋعا مۇمكىندىك بەرەدى. بولاشاقتا مەكتەپكە بارعاندا سول قولىمەن قالام ۇستاپ، جازا الۋ ءۇشىن قاجەت"، - دەيدى بالانىڭ اجەسى.

"مۇباراك وڭ قولدىڭ اپلازياسىمەن جانە سول قولدىڭ ءبىرىنشى جانە ەكىنشى ساۋساقتارىنىڭ فالانگالارى جوق بولىپ دۇنيەگە كەلدى. بالا جۇرەدى، وينايدى، اتا-اناسى وعان وڭ بىلەگىنە كوسمەتيكالىق پروتەزگە تاپسىرىس بەردى. دامۋ جاعىنان بالا ءوز قاتارىنان قالمايدى، ونىڭ بارلىق اناليزدەرى قالىپتى. ساۋساقتى قولعا ترانسپلانتاسيالاۋ بويىنشا وتا سەگىز ساعاتقا سوزىلدى. مۇباراكقا قالپىنا كەلۋ قاجەت. مۇنداعى بارلىق وتالار ءارتۇرلى سيپاتتا بولدى. ونىڭ ىشىندە تۋا بىتكەن اقاۋلار دا، جاراقات العاننان پايدا بولعان ەرەكشەلىكتەر دە بار"،- دەپ اتاپ ءوتتى №2 بالالار قالالىق كلينيكالىق اۋرۋحاناسىنىڭ ديرەكتورى مارات راباندياروۆ.

"الماتى قالاسىننىڭ №2 بالالار قالالىق كلينيكالىق اۋرۋحاناسىنىڭ 20-دان استام قىزمەتكەرى ماستەر-كلاسسقا قاتىستى. اياق-قولدارىندا تۋا بىتكەن جانە جۇرە پايدا بولعان اقاۋلارى بار بارلىق بالالاردىڭ ىشىنەن ءبىزدىڭ دارىگەرلەر كونسيليۋمى كومەك كورسەتىلگەن التى پاسيەنتتى تاڭدادى. مۇنداي ماستەر-كلاسستى دارىگەرلەردىڭ كاسىبيلىگىنسىز، سونداي - اق ءبىزدىڭ باس سەرىكتەسىمىز-"Samruk-Kazyna Trust" الەۋمەتتىك جوبالاردى دامىتۋ قورىنىڭ قولداۋىنسىز وتكىزۋ مۇمكىن بولماس ەدى"، - دەپ قورىتىندىلادى "مەيىرىمدىلىك" ەرىكتى قوعامى" قوعامدىق قورىنىڭ ديرەكتورى ارۋجان ساين.