بەيجىڭ ويىندارىنا باراتىنىمدى قاڭتاردىڭ ورتاسىندا عانا ءبىلدىم
شاڭعىمەن جۇگىرۋدەن قازاقستان ايەلدەر كومانداسىنىڭ مۇشەسى يرينا بىكوۆا Olympic.kz سايتىنا سۇحبات بەرىپ، ەستافەتا ناتيجەسىنە بايلانىستى پىكىرىمەن ءبولىستى. سپورتشىنىڭ ايتۋىنشا، ول ەستافەتا كەزىندە ۆالەريا تيۋلەنيەۆانى اۋىستىرعان.
«نەگىزى، مەن ەستافەتاعا قاتىساتىن تىزىمدە جوق ەدىم. ءبىراق ۆالەريا تيۋلەنيەۆا اۋىرىپ قالعاسىن، ورنىنا مەن شىقتىم. جارىس كوڭىلىمنەن شىقتى، بارلىق قىزدار دا جاراپ تۇر. ارينە، ناتيجە كوڭىل قۋانتپايدى. دەسە دە، ءبىز ءوز شاما-شارقىمىز جەتكەنشە جۇگىردىك.
بۇل مەنىڭ العاشقى وليمپيادام. ءتورتجىلدىق دوداسىنا قاتىسۋ مەن ءۇشىن ارمان بولاتىن. وكىنىشكە قاراي، بەيجىڭ ويىندارىنا باراتىنىمدى قاڭتاردىڭ ورتاسىندا عانا ءبىلدىم. بىردەن جولداما العانىم جوق. سوندىقتان، جوسپارلى تۇردە دايىندالۋ مۇمكىن بولمادى. وليمپيادا قارساڭىنداعى بار جاتتىعۋىم تۋعان قالام پاۆلوداردا ءوتتى. وسىنداعى جاعداي مەن مەن تۇراتىن قالاداعى جاعدايدى سالىستىرۋ مۇمكىن ەمەس.
ءبارى ويداعىداي ەمەس، الايدا، ۇلكەن تاجىريبە العانىم انىق. باستى دوداعا قاتىسقانىم ءۇشىن قۋانىشتىمىن»، - دەدى يرينا.
ەسكە سالا كەتەيىك، قازاقستاندىق شاڭعىشى قىزدار كوماندالىق ەستافەتادا 15ء-شى ورىن يەلەندى.