باقىتجان ساركەيەۆ: «يگى ىستەردى كەيىنگە قالدىرماي، بۇگىن باستايىق»

قارجى ساراپشىسى باقىتجان ساركەيەۆ مەملەكەت باسشىسى قاسىم-جومارت توقايەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ايتىلعان تاپسىرمالاردى جوعارى باعالادى. ساراپشىنىڭ پىكىرىنشە، حالىقتىڭ الەۋمەتتىك جاعدايىن جاقسارتۋ ءبىرىنشى كەزەكتەگى مىندەت بولىپ قالا بەرەدى.

ەكىنشى دەڭگەيلى بانكتەردىڭ جاۋاپكەرشىلىگى:
– «ءبىر كەزدەرى ەكىنشى دەڭگەيلى بانكتەرگە مول قاراجات بەرىلدى. ولار مەملەكەت ەسەبىنەن كۇن كوردى دەسەك، ارتىق ەمەس. ەندى ولاردىڭ حالىق يگىلىگى ءۇشىن جۇمىس ىستەيتىن كەزى كەلدى. ەگەر بانكتەر شارۋاشىلىق سۋبەكتىلەرىنە ناقتى قولداۋ كورسەتىپ، تومەن پايىزبەن نەسيە بەرسە، كوپتەگەن الەۋمەتتىك جانە ەكونوميكالىق ماسەلە وزدىگىنەن شەشىلەدى»، – دەدى ساركەيەۆ.

دوللار باعامىن تۇراقتاندىرۋ جولدارى:
ساراپشى دوللار باعامىنىڭ 500 تەڭگەدەن اسىپ كەتۋىن شەشۋدىڭ ءتيىمدى جولىن – ەكونوميكانى ءارتاراپتاندىرۋدى ۇسىنادى.

– «ءوندىرىس ورىندارىن، زاۋىتتار مەن فابريكالاردى كوبەيتۋ ارقىلى ءبىز ەكونوميكالىق تۇراقتىلىققا قول جەتكىزەمىز. ەلىمىز مۇناي، گاز، ۋران، كومىر، تەمىر، مىس جانە مىرىش سياقتى رەسۋرستارعا باي. ءبىراق ولاردى شيكىزات كۇيىندە ەمەس، تەرەڭ وڭدەپ، شەتەلگە ەكسپورتتاۋ قاجەت. بۇل ۇلتتىق ەكونوميكانى نىعايتىپ، تەڭگە باعامىن تۇراقتاندىرۋعا ىقپال ەتەدى»، – دەدى ول.

جاسايتىن ءىستى كەيىنگە قالدىرماۋ:
ساركەيەۆتىڭ پىكىرىنشە، قازاقستاننىڭ الەۋمەتتىك-ەكونوميكالىق ماسەلەلەرىن شەشۋ ءۇشىن ارەكەت ەتۋ ۋاقىتى – ءدال ءقازىر.

– «بىرلەسىپ اتقاراتىن جاقسى ىستەردى ەرتەڭگە قالدىرماي، بۇگىننەن باستاعان ءجون. حالىقتىڭ ءال-اۋقاتىن جاقسارتۋعا باعىتتالعان ءاربىر باستاما ماڭىزدى»، – دەدى ساراپشى.