بۇگىندە قازاقستان جازۋشىلار وداعىنىڭ قۇرامىندا 820 مۇشە بار، ولاردىڭ 400ء-ى الماتىدا تۇرادى.
الماتى اكىمى باقىتجان ساعىنتايەۆ قازاقستان جازۋشىلار وداعىنىڭ مۇشەلەرىمەن شىعارماشىلىق بىرلەستىكتى قولداۋ جانە دامىتۋ ماسەلەلەرىن تالقىلادى، سونداي-اق مەرەيتويلىق داتاعا ورايلاستىرىلعان «الماتى-تاۋەلسىزدىكتىڭ التىن بەسىگى» بايقاۋىنىڭ قورىتىندىسى شىعارىلدى، دەپ حابارلايدى Almaty-akshamy.kz
كەزدەسۋدە باقىتجان ساعىنتايەۆ كوروناۆيرۋس بويىنشا كۇردەلى سانيتارلىق-ەپيدەميولوگيالىق احۋالدى قالا تۇرعىندارىنىڭ ەسىنە سالدى. دەرت دەڭگەيىنىڭ تومەندەۋىنە قاراماستان، الەمدە جاڭا "وميكرون" شتامى تارالۋدا. ونىڭ قازاقستانعا ەنۋى ابدەن مۇمكىن. سوندىقتان قالا اكىمى بارلىق الماتىلىقتاردى ءوز دەنساۋلىعىن ساقتاۋعا جانە دارىگەرلەردىڭ حالىقتى ۆاكسينالاۋ، ەندى ريەۆاكسينالاۋ جونىندەگى كۇش-جىگەرلەرىن قولداۋعا شاقىردى.
2019 جىلدىڭ سوڭىندا قالىپتاسقان داستۇرگە ساي الماتىلىق اقىندار مەن جازۋشىلار الماتى اكىمىنىڭ گرانتىنا يە بولدى.
سونداي-اق، بۇگىن مەرەيتويلىق داتاعا ورايلاستىرىلعان «الماتى – تاۋەلسىزدىكتىڭ التىن بەسىگى» شىعارماشىلىق بايقاۋىنىڭ قورىتىندىسى شىعارىلدى. مەترلەرمەن قاتار بايقاۋعا جاس اقىندار مەن جازۋشىلار قاتىستى. شىعارماشىلىق جۇمىستار ءتورت جانردا ۇسىنىلدى – پوەزيا، پروزا، بالالار ادەبيەتى، دراماتۋرگيا.
اسحات ومىربايەۆ «اكە، ەلگە قايتايىقشى!» اڭگىمەسى، تۇرىسبەك ساۋكەتايەۆ «كوكشۋلان» نوۆەللاسى، دۋمان رامازان «ۇكىم» تاريحي دراماسى، پاتيگۇل ماحساتوۆا قازاق تىلىندەگى ولەڭدەر توپتاماسى ءۇشىن جەڭىمپاز بولىپ تانىلدى.
باقىتجان ساعىنتايەۆتىڭ تاپسىرماسى بويىنشا وتكەن جىلى 30 اۆتوردىڭ جۇمىسىن باسىپ شىعارۋ ءۇشىن قارجى ءبولىندى. جاس جازۋشىلاردىڭ دا، قازاق ادەبيەتى كلاسسيكتەرىنىڭ دە ەڭبەگى قولداۋ تاپتى. اعىمداعى جىلى جۇزدەن استام تانىمال ءسوز شەبەرلەرى مەن جاس اۆتورلاردىڭ كىتاپتارى جارىق كوردى. كىتاپتاردىڭ تۇساۋكەسەرى قالا كىتاپحانالارىندا وتەدى.
«جازۋشىلار قاۋىمداستىعىن قولداۋ جالعاسادى. سىزدەر تاريحي وقيعالاردىڭ شىنايى كۋاسى رەتىندە ولاردى جۇرەكتەن وتكىزىپ، وقىرمانعا جەتكىزەسىزدەر. تاۋەلسىزدىكتىڭ مەرەيلى جىلىندا سىزدەرگە زور دەنساۋلىق پەن شابىت تىلەيمىن!» - دەدى باقىتجان ساعىنتايەۆ كەزدەسۋ سوڭىندا.