باقىتجان ساعىنتايەۆ قازا تاپقان پوليسەيلەردىڭ وتباسىلارىنا پاتەر كىلتتەرىن تاپسىردى

كەزدەسۋ بارىسىندا قالا اكىمى تاعى دا كوڭىل ايتىپ، پوليسەيلەردىڭ جەسىرلەرىنە پاتەر كىلتىن تابىستادى.

الماتى اكىمى باقىتجان ساعىنتايەۆ قايعىلى وقيعادان قازا تاپقان پوليسەيلەردىڭ وتباسىلارىمەن كەزدەستى، دەپ حابارلايدى Almaty-akshamy.kz

الماتى اكىمدىگىنىڭ باستاماسى سوت شەشىمىن ورىنداۋ بويىنشا قىزمەتتىك بورىشىن ورىنداۋ كەزىندە قازا تاپقان پوليسەيلەردىڭ وتباسىلارىن قولداۋ ماقساتىندا قابىلداندى.

پوليسيا كاپيتانى نۇربول بايعازييەۆ ىشكى ىستەر ورگاندارىندا 2014 جىلدىڭ قىركۇيەگىنەن باستاپ قىزمەت ەتتى. 2021 جىلدىڭ 28 شىلدەسىنەن باستاپ الاتاۋ اۋداندىق پب جانىنداعى پوليسيا ءبولىمىنىڭ ۋچاسكەلىك پوليسيا ينسپەكتورى قىزمەتىن اتقاردى. ونىڭ ارتىندا 5 جانە 7 جاستاعى ەكى بالاسى قالدى.

پوليسيا مايورى دارحان سۇلەيەۆ ىشكى ىستەر ورگاندارىندا 2003 جىلدىڭ قاڭتارىنان باستاپ قىزمەت ەتتى. 2021 جىلدىڭ 20 تامىزىنان باستاپ الاتاۋ اۋداندىق پب جانىنداعى پوليسيا ءبولىمىنىڭ ۋچاسكەلىك پوليسيا ينسپەكتورى قىزمەتىن اتقاردى.

ونىڭ ارتىندا كامەلەتكە تولماعان بەس بالاسى قالدى، ولاردىڭ ەڭ كىشىسى – 4، ۇلكەنى – 16 جاستا. بايعازييەۆتىڭ وتباسى سياقتى ونىڭ دا جەكە تۇرعىن ءۇيى بولعان جوق.