ورتالىق كوممۋنيكاسيالار قىزمەتىندەگى باسپا ءسوز كونفەرەنسياسىندا الماتى اكىمى باقىتجان ساعىنتايەۆ جۋرناليستەردىڭ سۇراقتارىنا جاۋاپ بەرە وتىرىپ، قۇرىلىس سالۋشىلاردىڭ جاڭا ەرەجەلەرگە سايكەس جۇمىس ىستەپ جاتقانىن مالىمدەدى، دەپ حابارلايدى اlmaty-akshamy.kz
سالىنىپ جاتقان نىساندار ەرەجەلەرگە قاتاڭ سايكەس كەلۋى جانە الماتى ورتالىعىنىڭ ارحيتەكتۋرالىق كەلبەتىن بۇزباۋى ءتيىس. بۇل رەتتە ورتالىقتاعى قۇرىلىس تىعىزدىعى گەكتارىنا 300 ادامنان اسپاۋى ءتيىس.
بۇدان باسقا، ەرەجەدە ءۇي اۋماعىنىڭ مەترى ءار تۇرعىنعا كەم دەگەندە 10 شارشى مەتر بولۋى كەرەك دەلىنگەن. بۇل شارشى مەترلەرگە جاسىل كەڭىستىكتەر دە كىرەدى.
بۇل تالاپ تەك ورتالىقتا عانا ەمەس، بارلىق جاڭا قۇرىلىستارعا قاتىستى. «الماتى – شەتسىز قالا» تۇجىرىمداماسىنا سايكەس، قالانىڭ بارلىق اۋداندارىندا تىعىزدىعى گەكتارىنا 440 ادامنان اسپاۋى ءتيىس.
سونداي-اق، ەرەجەدە الەۋمەتتىك ينفراقۇرىلىمعا ەرەكشە نازار اۋدارىلعان. قۇرىلىس سالۋشى جوبانى ازىرلەۋ كەزىندە قۇرىلىس اۋماعىنىڭ مەكتەپكە دەيىنگى بالالار مەكەمەلەرىمەن قامتاماسىز ەتىلۋىن؛ جالپى ءبىلىم بەرەتىن (مىڭ ادامعا كەمىندە 180 ورىن) جانە مەديسينالىق مەكەمەلەر مەن ۋچاسكەلىك پوليسيا پۋنكتىنىڭ بولۋىن ەسكەرۋگە مىندەتتى. بارلىق الەۋمەتتىك وبەكتىلەر «قادامدىق قولجەتىمدىلىكتە» بولۋعا ءتيىس.
وسى تالاپتاردى ساقتاعان كەزدە، حالىقتىڭ تىعىزدىعى 20%-دان اسپاۋى مۇمكىن. سونىمەن قاتار، ءاربىر قۇرىلىس سالۋشىعا جاقىن ماڭداعى ۇيلەردىڭ تۇرعىندارىمەن جوباعا قوعامدىق تالقىلاۋ جۇرگىزۋ ۇيعارىلادى، ولاردىڭ مۇددەلەرى قۇرىلىسقا تىكەلەي اسەر ەتەدى. سالىنعان نىساندارعا كەلەتىن بولساق، بۇل جاعدايدا زاڭنىڭ كەرى كۇشى بولمايدى.
قالا تۇرعىندارىنىڭ كوپتەگەن وتىنىشتەرى بويىنشا ءبىرقاتار نىسانداردا قۇرىلىس توقتاتىلدى. قۇرىلىس سالۋشىلارعا جوبالاردى ەرەجە تالاپتارىنا سايكەس كەلتىرۋ ۇسىنىلدى. قۇرىلىس وسى شارت ورىندالعان جاعدايدا عانا جالعاساتىن بولادى.
اكىمدىك الەۋمەتتىك ينفراقۇرىلىمدى دامىتۋ، ونىڭ ىشىندە بولاشاق جاڭا قونىستانۋشىلاردى بالاباقشالارمەن، مەكتەپتەرمەن جانە مەديسينالىق مەكەمەلەرمەن قامتاماسىز ەتۋ ماقساتىندا قۇرىلىس سالۋشىلارمەن بەلسەندى جۇمىس جۇرگىزۋدە.
بۇل جوسپارلى جانە اۋقىمدى جۇمىس الماتىداعى قالا قۇرىلىسى سالاسىن جەتىلدىرۋگە جانە جاقسارتۋعا، ءاربىر الماتىلىقتىڭ ءومىرى ءۇشىن قالانى نەعۇرلىم جايلى ەتۋگە مۇمكىندىك بەرەدى.