ەكولوگتار اقىل-كەڭەسىن جەتكىزدى.
قازاقستان پرەزيدەنتى ەكولوگيا مينيسترىنە سوگىس جاريالاي وتىرىپ، اقبوكەندەردى قىرۋدان باسقا جول ىزدەۋدى تاپسىردى. ماماندار باسقا جولى بارىن ايتتى، دەپ حابارلايدى Almaty-akshamy.kz Inbusiness.kz سىلتەمە جاساپ.
مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆكە سوگىس جاريالاعانى ءمالىم. بۇعان گەولوگيا سالاسىنىڭ دەگراداسياعا ۇشىراۋى سىرتىندا، باس ەكولوگتىڭ 80 مىڭ كيىكتى قىرۋعا رۇقسات ەتپەكشى بولعانى دا ىقپال ەتتى. ويتكەنى ولار ءار وڭىردە ەگىنگە جاۋداي ءتيىپ جاتقان كورىنەدى.
ءدال ءقازىر قورىقشىلارمەن بىرگە ايماقتا ءتۇز تاعىلارىنىڭ مەكەنىن ارالاپ، رەيد جۇرگىزىپ جۇرگەن ءماجىلىس دەپۋتاتى باقىتبەك سماعۇل وسىعان قاتىستى پىكىرىن ءبىلدىردى.
«بۇل ماسەلە جونىندە مامانداردىڭ، ەكولوگتاردىڭ اقىل-كەڭەسىن تىڭدادىم. ولار كيىكتەردى اتۋمەن پروبلەما جويىلمايدى دەيدى. سەبەبى بۇل – كەشەندى تۇردە شەشۋدى قاجەت ەتەتىن تۇيتكىل. بىرىنشىدەن، قازاقستاندا سۋ كوزدەرى تارتىلىپ قالۋدا. سودان اۋعان اقبوكەندەر جاساندى سۋلاندىرىلاتىن ەگىستىكتەردى جاعالايدى. ەكىنشىدەن، جەرگىلىكتى اكىمدىكتەر اۋىل شارۋاشىلىعى جەرلەرىن بەيبەرەكەت تاراتا بەرەدى، بۇل سالادا عىلىمي نەگىزدەلگەن كوزقاراس جوق. سالدارىنان كيىكتەردىڭ جايىلىمى دا تارىلىپ بارادى. كيىك ەگىنگە ەمەس، ءبىرىنشى كەزەكتە بۇرىن جايىلعان جەرىنە كەلەدى. ءتۇز تاعىسى ادامنىڭ ەمەس، تابيعاتتىڭ زاڭىنا باعىنادى عوي»، – دەدى باقىتبەك سماعۇل.
مامانداردىڭ ايتۋىنشا، بۇدان باسقا دا اۋىر، سالماقتى پروبلەمالار بار. مىسالى، ۇكىمەت قازاقستاندى ايقۇش-ۇيقىش حالىقارالىق تراسسالارمەن، اقىلى جولدارمىن جابۋدا. تراسسانىڭ ءبارى "سىرتتان اقىسىن تولەمەگەن كولىك كەلىپ قوسىلماسىن" دەپ، قاپتالىنان قورشاپ تاستالادى. ودان كيىكتەر دە وتە المايدى. بۇل اقبوكەندەردىڭ تابيعي ميگراسياسىن بۇزدى، كيىك تابىندارى بىر-بىرىمەن ارالاسا الماي قالدى. سالدارىنان، وزگە پوپۋلياسيالارمەن، تابىندارىمەن ارالاسىپ، قانىن جاڭارتا الماي، تۇقىمى ازعىندالا باستادى دەگەن دەرەكتەر بار. ونداي كيىكتەر اۋرۋشاڭ كەلەدى، قاتاڭ ءارى وزگەرە باستاعان كليماتقا شىداي الماي قىرىلۋى ىقتيمال.
بۇل رەتتە دەپۋتات يندۋستريا جانە ينفراقۇرىلىمدىق دامۋ مينيسترلىگىنە جول، اسىرەسە ماگيسترال سالعاندا، ودان كيىكتەر، جانۋارلار ءوتۋى ءۇشىن جەراستى وتپەسىن قوسا قاراستىرۋدى ۇسىندى.
«پرەزيدەنتتىڭ ايتقان سىنىنا تولىق قوسىلامىن. قازاق ءۇشىن كيەلى جانۋاردى قىرۋعا بولمايدى، ءقازىر 80 مىڭىن اتسا، كەلەسى جىلى ودان دا كوبىن قىرۋعا تۋرا كەلەدى. بۇل ىسكە مينيستر رەستوراننىڭ مازىر-مەنيۋىن قاراعانداي كوزقاراسپەن ەمەس، قاسىم-جومارت كەمەل ۇلى ايتقانداي، ۇلتىمىزدىڭ مەنتاليتەتىن ەسكەرىپ، كاسىبي تۇرعىدان كەلگەنى ءجون. ادامزاتتىڭ تابيعي ۇيلەسىمى دە، جاھاندىق جاسىلدار قوزعالىسى دا وسىنى تالاپ ەتەدى. وسى ورايدا ايماققا ساپارىم اياسىندا بۇگىنىمدى ورمان شارۋاشىلىعى جانە جانۋارلار دۇنيەسى كوميتەتىنىڭ «وحوتزووپروم ءوب» رمقك قىزىلوردا وڭىرلىك فيليالى قىزمەتكەرلەرىمەن بىرگە وتكىزدىم. رەيدتىك ارالاۋىنا قاتىستىم. ءبىراز جايتقا قانىقتىم»، – دەيدى باقىتبەك سماعۇل.