بيىل ەلىمىزدە ب ا ق وكىلدەرىنىڭ قىزمەتىنە ارنالعان ۇلتتىق بايانداما ازىرلەنبەك. بۇل تۋرالى اقپارات جانە قوعامدىق دامۋ ۆيسە-مينيسترى قانات ىسقاقوۆ ءمالىم ەتتى، دەپ حابارلايدى Almaty-akshamy.kz.
«بىزگە ءمالىم، حالىقارالىق ۇيىمدار ءارتۇرلى باعىتتا باياندامالار ازىرلەيدى. وسى ورايدا ءبىز بيىل مەملەكەتتىك جانە ۇكىمەتتىك ەمەس ۇيىمدارمەن بىرلەسە وتىرىپ جىل سوڭىنا دەيىن مەملەكەت باسشىسىنا ۇلتتىق بايانداما ازىرلەيمىز. وندا الدىمەن تىلشىلەردىڭ قۇقىعىن قورعاۋ جانە ساقتاۋ تۋرالى مونيتورينگتىك تالداۋ، ب ا ق وكىلدەرىنىڭ قۇقىعى بۇزىلۋىنىڭ پروبلەمالارىن زەرتتەۋ، سونىمەن قاتار تىلشىلەردىڭ ءقاۋىپسىز جۇمىس ىستەۋى جانە اقپاراتتى ەركىن الۋى مەن تاراتۋ قارالادى»، - دەدى قانات ىسقاقوۆ ماجىلىستە «ماسس-مەديا» تۋرالى زاڭ جوباسىن تالقىلاۋ بارىسىندا.
ونىڭ ايتۋىنشا، ۇلتتىق بايانداما اقپاراتتى ەركىن الىپ، تاراتۋدا قولجەتىمدىلىكتى قامتيدى، دەپ جازدى قازاقپارات.
«ۇلتتىق بايانداما ارقىلى ب ا ق ىقپالى وسە تۇسەدى. بۇل ءبىز ءۇشىن ماڭىزدى»، - دەيدى ول.