قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارى تابىستالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
سالتاناتتى شارا بارىسىندا پرەزيدەنت اكىمشىلىگى باسشىسىنىڭ ورىنباسارى ايدا بالايەۆا پرەزيدەنت سىيلىعى مەن گرانتىنىڭ يەگەرلەرىن، العىسىن العان شىعارماشىلىق ۇجىمداردى قۇتتىقتادى. مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتىنىڭ سىيلىعى «Qazaq radiosy» راديوستانسياسىنىڭ باس رەداكتورى دۋلات ابيبۋللايەۆقا، «31 ارنا» تەلەراديوكومپانياسىنىڭ ءتىلشىسى ەرقانات كوپجاسارۇلىنا، «يندۋستريالنايا كاراگاندا» گازەتىنىڭ باس رەداكتورى وكسانا مياگكيحكە جانە «Qazaqstan» ۇلتتىق تەلەارناسىنىڭ ديرەكتورى ەركىن مۇحامەدجانوۆقا بەرىلدى.
پرەزيدەنت گرانتتارىن «جەتىسۋ» تەلەارناسىنىڭ رەداكتورى ءسانيا بايتاروۆا، «Almaty» تەلەراديوكومپانياسىنىڭ ارنايى تەحنيكا وپەراتورى دياسكەن بايتيبايەۆ، «حابار 24» تەلەارناسىنىڭ جۇرگىزۋشىسى انۋاربەك ءبىرىمجانوۆ، «Baigenews.kz» اقپارات اگەنتتىگىنىڭ ءتىلشىسى جادىرا جولمۇحامەتوۆا يەلەندى.
قازاقستان رەسپۋبليكاسى پرەزيدەنتىنىڭ العىسى «Adyrna» ۇلتتىق پورتالىنىڭ، «Ashyq alań» قوعامدىق-ساياسي توك-شوۋىنىڭ، «Astana» راديوسىنىڭ، «ۆەچەرنيايا استانا» قوعامدىق-ساياسي گازەتىنىڭ شىعارماشىلىق ۇجىمدارىنا تابىستالدى.