ب ا ق وكىلدەرى ءبىر جارىم جىلدان كەيىن ءماجىلىس وتىرىسىنا وفلاين تۇردە قاتىستى

نۇرلان نىعماتۋلين ب ا ق وكىلدەرىنە قاتىستى پىكىر ءبىلدىردى

پارلامەنت ءماجىلىسىنىڭ ءتوراعاسى نۇرلان نىعماتۋلين ب ا ق وكىلدەرى وفلاين فورماتتا پالاتاداعى ءىس-شارالارعا قاتىسۋىنا بايلانىستى پىكىر ءبىلدىردى، دەپ حابارلايدى Almaty-akshamy.kz

ءماجىلىس ءتوراعاسى كوروناۆيرۋس ىندەتىنە بايلانىستى شەكتەۋلەر ەنگىزىلگەندىكتەن، جۋرناليستەر قالىپتى رەجيمدە جۇمىس ىستەي الماعانىن ەسكە سالدى.

«بارشاڭىز جاقسى بىلەسىزدەر، ىندەتكە بايلانىستى سوڭعى ءبىر جارىم جىل ىشىندە اقپارات وكىلدەرى پارلامەنتتىڭ، ۇكىمەتتىڭ دە ەشقانداي شارالارىنا قاتىسا المادى. سوندىقتان بۇگىنگى وتىرىسىمىزدىڭ ءبىر ەرەكشەلىگى – وسى ءبىر جارىم جىل ىشىندە جۋرناليستەر ءبىرىنشى رەت كەلىپ وتىر. ارينە، بۇل جاقسى جاعداي، سەبەبى ءبىز ءۇشىن دە، ب ا ق وكىلدەرى ءۇشىن دە وفلاين جۇمىس وتە قاجەت ءارى ماڭىزدى»، - دەدى ن. نىعماتۋلين ءماجىلىستىڭ جالپى وتىرىسىندا.

ول وتكەن ءبىر جارىم جىل ىشىندە ماجىلىستەگى ءىس-شارالار ونلاين رەجيمدە كورسەتىلگەنىن اتاپ ءوتتى.

«جالپى وتىرىستان كەيىن جۋرناليستەردىڭ زاڭ جوبالارى بويىنشا دەپۋتاتتارعا، مينيسترلەرگە، مەملەكەتتىك ورگاندار باسشىلارىنا سۇراق قويۋ تاجىريبەسىن جالعاستىرامىز»، - دەدى ءماجىلىس ءتوراعاسى.