بانكروتتىق تۋرالى زاڭ قالاي ىسكە اسادى؟
بۇگىننەن باستاپ بانكروتتىققا ءوتىنىم قابىلداۋ باستالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
2022 جىلدىڭ 30 جەلتوقسانىندا «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭعا قول قويىلدى. زاڭ 1 قاڭتاردا رەسمي تۇردە جاريالاندى. زاڭ جوباسىن ازىرلەۋ بارىسىندا جەكە تۇلعالاردىڭ بانكروتتىعى ينستيتۋتى قالىپتاسقان ەلدەردىڭ تاجىريبەسى سارالانىپ، ءتيىستى نورمالار الىندى.
قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، بىلتىرعى جىلدىڭ قورىتىندىسى بويىنشا قازاقستاندىقتاردىڭ نەسيە قارىزى 14 ترلن تەڭگەگە جەتكەن. سونىڭ ىشىندە تۇتىنۋشىلىق نەسيەنىڭ كولەمى – 8 ترلن تەڭگەنى قۇراعان. مەملەكەتتىك كىرىستەر كوميتەتىنىڭ حابارلاۋىنشا، 1،5 ملن ادام قارجى ينستيتۋتى الدىنداعى قارىزىن تولەي الماي جۇرگەنىنە 90 كۇننەن اسىپ كەتكەن. ءبىر باسىندا بىرنەشە نەسيەسى بارلار دا جەتەرلىك. ياعني، ازاماتتاردىڭ تولەم قابىلەتىنىڭ ناشارلاۋى اتالعان شاراعا جۇگىنۋگە ءماجبۇر ەتتى دەگەن قورىتىندىعا كەلۋگە بولادى.
زاڭ جوباسىن ازىرلەۋ بارىسىندا جەكە تۇلعالاردىڭ بانكروتتىعى ينستيتۋتى قالىپتاسقان ەلدەردىڭ تاجىريبەسى سارالانىپ، ءتيىستى نورمالار الىنعانىن اتاپ وتتىك. وسىلايشا، راسىمدەردىڭ ءۇش ءتۇرى ەنگىزىلدى. ولار – سوتتان تىس بانكروتتىق، سوت ارقىلى بانكروتتىق جانە تولەم قابىلەتتىلىگىن قالپىنا كەلتىرۋ. اتالعان راسىمدەرگە تەك قارىز الۋشىنىڭ ءوزى باستاماشى بولا الادى، ياعني كرەديتوردىڭ بورىشكەردى بانكروت دەپ جاريالاۋ جايلى ءوتىنىش بەرۋگە قۇقىعى بولمايدى.